BABALA! SENSITIBONG BALITA:
4 MOST WANTED PERSONS SA GITNANG LUZON, ARESTADO
Matagumpay na naaresto ng Police Regional Office 3 (PRO3) sa magkakahiwalay na operasyon sa Bulacan at Pampanga ang apat (4) sa mga Most Wanted Persons sa Gitnang Luzon noong June 17, 2025.
Base sa report ng kapulisan, unang nadakip dakong 11:40 ng umaga sa San Ildefonso, Bulacan si Marcelo Mercado y Lumabao, 46 years old, magsasaka, na Number 1 Most Wanted Person sa municipal level.
Nahaharap siya sa kasong Acts of Lasciviousness kaugnay ng Section 5(b) ng R.A. 7610 (Special Protection of Children Against Abuse, Exploitation and Discrimination Act). Inisyu ni Judge Alejandria Javier Genota ng RTC Branch 17, Malolos City ang warrant na may rekomendadong piyansa na Php80,000.00.
Makalipas umano ang siyam na minuto, 11:49 ng umaga, sumunod na nahuli sa Apalit, Pampanga si John Lester Villanueva Fajardo, alyas “JL,” disi otso anyos, na may kasong paglabag sa Sections 5 at 11, Article II ng R.A. 9165 (Comprehensive Dangerous Drugs Act of 2002).
Inisyu naman ni Judge Katherine Legarda Pajaron ng RTC Branch 54, Macabebe ang warrant na may piyansang Php200,000.00 at Php120,000.00.
Bandang alas kwatro singkwentay singko ng hapon sa Calumpit, Bulacan, naaresto naman ng mga pulis si Terry Rosal y Azucenas, 42 years old, caretaker at residente ng Brgy. Balungao, Calumpit.
Siya ang Number 1 Most Wanted Person sa municipal level at nahaharap sa kasong panggagahasa (Rape). Isinilbi sa kanya ang Warrant of Arrest na walang inirerekomendang piyansa.
Panghuli, dakong 11:00 ng gabi, sa Doña Remedios Trinidad (DRT), Bulacan nahuli si Ernesto Jordan y Mojeno, singkwentay tres anyos, na Number 3 Most Wanted sa municipal level.
Ayon sa warrant na inisyu ni Judge Theresa Genevieve N. Co ng RTC Branch 17, Malolos City, nahaharap siya sa kasong paglabag sa Section 28 ng R.A. 10591 (Comprehensive Firearms and Ammunition Regulation Act), na may piyansang Php100,000.00.
