Nakikiusap ang SAJELCO o San Jose City Electric Cooperative sa mga konsumedores na unawaing tumaas ang generation charge dahil wala silang kontrol sa pandaigdigang krisis sa presyo ng coal at ang kanilang kontrata ay sa isang coal fire power plant.
Ayon kay SAJELCO General Manager Cesar Ubungin, 3rd quarter ng taong 2021 nang magsimulang tumaas ang presyo ng taripa sa kuryente bunsod ng pagtaas sa presyo ng coal sa world market at pagbaba ng halaga ng piso kontra dolyar dahil sa alitan sa pagitan ng Russia at Ukraine.
Sa buwan ng Hulyo, pumapatak na sa P16.97 per kilowatt hour ang rate sa kuryente sa residential habang P15.99 per kilowatt hour sa commercial at P14.37 sa industrial.
Ipinaliwanag ni Engr. Ubungin na sa unang dalawang taon na nakakontrata ang SAJELCO sa Masinloc Coal Power Plant na pagmamay- ari ng San Miguel Corporation ay naging maganda ang rate nito.
Subalit ngayon ay lumabas na mas mataas ang kanilang singil kumpara sa mga katabing electric cooperative.
Ngunit simula nang tumaas ang taripa ay gumawa na rin ng hakbang ang SAJELCO para mapababa ang kuryente kung saan kumausap na sila ng isang renewable energy developer upang masimulan ang proseso ng pagpapatayo ng 10 megawatt power plant na hindi pa nakakontrata sa Masinloc Coal Power Plant. Ang nasabing solusyon ay aabutin ng mahigit isang taon.
Hindi rin aniya posible na bumaba sa mga susunod na buwan ang singil sa kuryente dahil nakadepende ito sa presyo ng coal sa world market.
