‘GHOST PROJECTS’ SA LUPAO, NABISTO DAHIL SA MGA PEKENG DOKUMENTO NG KONTRAKTOR

‘GHOST PROJECTS’ SA LUPAO, NABISTO DAHIL SA MGA PEKENG DOKUMENTO NG KONTRAKTOR

Umabot sa P189,749,885.43 ang halaga ng tatlong “ghost projects” na nadiskubre sa bayan ng Lupao, Nueva Ecija, na kinabibilangan ng isang flood control project, school building, at farm-to-market road na idineklarang “completed” ng kumpanyang TOPMOST Construction mula Pulilan, Bulacan.

Nabisto ang anomalya matapos makatanggap ang Local Government Unit (LGU) ng isang letter mula sa Department of Public Works and Highways (DPWH) Central Office noong September 4, 2025 upang i-verify ang status at authenticity ng mga “completed projects.”

Kabilang sa pinapa-verify ang Notice of Award, Contract Agreement, Notice to Proceed, Bill of Quantities, at Certificate of Completion and Acceptance, at lumabas na peke ang mga pirma sa dokumento.

Batay sa mga naturang dokumento, sinasabing natapos ang P85-million na farm-to-market road sa Visayas at Mindanao, Barangay San Pedro noong February 12, 2024; ang P76.5-million na flood control system-sheetpilling sa San Antonio Este, Evacuation Site noong October 27, 2023; at ang P28.2-million na classroom school building sa Agupalo Weste Elementary School noong April 12, 2024.

Ngunit nang puntahan at inspeksyunin ng LGU at Balitang Unang Sigaw ang mga lugar, wala ni isang istrukturang makita.

Kinumpirma rin nina Mayor Glenda P. Romano at Vice Mayor Alex V. Romano na hindi sila sangkot sa anumang ganitong proyekto.

Dagdag pa ni Rolando S. Lacanlale, Executive Assistant ng Lupao Mayor’s Office, agad na nagsagawa ng imbestigasyon ang LGU at lumabas na lahat nga ng dokumento ay pineke, mula sa municipal letterhead hanggang sa pirma ng Vice Mayor at Municipal Treasurer.

Samantala, noong October 2, 2025, naghain na ang LGU ng tugon sa DPWH kung saan idineklara nilang “spurious” o peke ang lahat ng dokumentong binanggit, at kinumpirmang walang anumang aktwal na konstruksyon sa mga lokasyong tinukoy.

Iginiit din ni Lacanlale na handa silang tumulong sa anumang imbestigasyon, lalo’t walang katibayan na na-download sa LGU ang kahit anong pondo para sa mga proyektong ito.

Sa ngayon, hinihintay pa ng Lupao LGU ang magiging tugon ng DPWH hinggil sa kanilang pagsusumite ng mga dokumentong nagpapatunay sa falsification na ginawa ng TOPMOST Construction.