KAUNA-UNAHANG NIGHT MARKET NG CAALIBANGBANGAN, NAISAKATUPARAN SA TULONG NG PAMAHALAANG PANLALAWIGAN
Matagumpay na inilunsad ang kauna-unahang Night Market sa Barangay Caalibangbangan, Cabanatuan City, na opisyal na nagbukas noong November 15 at magpapatuloy hanggang December 31, 2025.
Ang proyektong ito ay naisakatuparan sa pakikipagtulungan ng pamahalaang barangay at ng Pamahalaang Panlalawigan ng Nueva Ecija.
Ayon kay Provincial Administrator Jose Maria Ceasar San Pedro, personal na lumapit si Kapitan Deo dela Cruz kay Gov. Aurelio “Oyie” Umali upang humiling ng pahintulot na magamit ang Caalibangbangan Park bilang venue ng night market.
Pinayagan ito ng gobernador sa kondisyon na mapanatili ang kalinisan at kaayusan ng parke, na pagmamay-ari at pinapangasiwaan ng Pamahalaang Panlalawigan.
Bukod dito, libre rin ang kuryenteng ginagamit ng mga tindero sa night market, bilang tulong ng Kapitolyo sa mga residenteng nais maghanapbuhay ngayong papalapit ang Kapaskuhan.
Sa kasalukuyan, humigit-kumulang 30 vendors mula sa Caalibangbangan at ilang kalapit-barangay ang kalahok sa night market.
Tampok dito ang iba’t ibang pagkain, produkto, at live entertainment tulad ng live bands at acoustic performances na nagbibigay-sigla sa lugar gabi-gabi.
Ibinahagi ni Kapitan Deo, isa sa kaniyang mga layunin ay maishowcase kung ano ang meron sa kanilang barangay at mabigyan ng pagkakataon ang kanyang mga nasasakupan na makapaghanap-buhay kaya sa tulong ng sangguniang barangay at pakikipag-ugnayan sa Kapitolyo, naging posible ang pagpapasigla sa lugar.
Nagpaabot ng pasasalamat si Kapitan Deo sa pamahalaang panlalawigan, partikular kay Gov. Oyie at Ma’am Cherry Umali, dahil sa suporta nila sa proyekto.
Aniya, malaking bagay ang pagtulong ng probinsya upang maging masaya at makabuluhan ang karanasan ng mga residente ngayong holiday season.
Inaanyayahan naman ng barangay ang mga residente ng Caalibangbangan at mga kalapit-barangay na dumalo at masiyahan sa pagkain, musika, at masiglang komunidad sa Caalibangbangan Night Market, isang lugar kung saan “mabubusog ka na, masisiyahan ka pa.”
