‘BUILDING GREEN ACT’: PAGTATANIM NG PUNO, GAGAWING REQUIREMENT SA PAGKUHA NG BUILDING PERMIT
Isinusulong ni Pampanga First District Representative Carmelo “Pogi” Lazatin, Jr. ang paglalagay ng Tree Planting Plan (TPP) bilang dagdag na requirement sa pagkuha ng building permits sa ilalim ng kanyang panukalang House Bill No. 6325.
Kung maipapasa, makikilala ito bilang “Building Green Act,” na mag-uutos na isama ang TPP sa lahat ng aplikasyon para sa building permits, kasama ang new construction, additions, alterations, at major repairs.
Sa Facebook post ni Lazatin, sinabi niyang ramdam sa bansa ang matinding epekto ng pagkasira ng kalikasan at climate change nitong mga nagdaang buwan, kaya kailangan aniyang palakasin ang pagtatanim ng puno at pangangalaga sa kapaligiran.
Sa TPP, dapat nakasaad ang lot at project floor area, layout ng planting areas, at bilang ng itatanim na puno, kung saan isang puno kada 500 square meters para sa commercial at industrial; at isang puno kada 250 square meters para sa residential.
Nakapaloob din sa panukalang batas na ang Department of Public Works and Highways ang mag-iintegrate ng TPP requirement sa building permit process, ang Department of Environment and Natural Resources ang magtatakda ng technical standards, at ang Department of the Interior and Local Government ang magbabantay kung sumusunod ang mga lokal na pamahalaan.
Matatandaang si Lazatin ang may-akda ng City Ordinance No. 456 sa Angeles City na nagre-require ng “Greening Program” sa mga negosyo.
Noong siya’y mayor pa lamang, pinangunahan niya ang reforestation ng Sapangbato Watershed, kung saan umabot sa 145,041 seedlings ang naitanim bago siya bumaba sa puwesto.
