SINADYA UMANONG PANUNOG SA MGA JEEPNEY SA BULAON, SAN FERNANDO, INIIMBESTIGAHAN; ISANG LALAKI PERSON OF INTEREST
Iniimbestigahan ng mga awtoridad ang umano’y sinadyang panununog sa tatlong jeepney na naganap sa Bulaon Public Market, lungsod ng San Fernando, Pampanga, madaling araw ng Lunes, Enero 26.
Batay sa kuha ng CCTV ng naturang barangay, bandang alas-3 ng madaling araw nang magsimula ang apoy mula sa isang nakaparadang jeepney na kalaunan ay kumalat at tumupok sa dalawa pang sasakyan.
May tatlo pang jeepney na nakaparada sa lugar ang bahagyang napinsala ng apoy.
Isa sa mga jeepney na tinupok ng apoy ang sinubukan pang iligtas ng may-ari, subalit hindi na ito naisalba at tuluyang nasunog.
Nakuhanan din ni Benjamin Regala ang nangyaring sunog at kaagad na umani ng reaksyon mula sa netizens at nagsabing posibleng sinadya ang pagsunog sa mga jeepney.
Tinatayang nasa P450, 000 hanggang P600, 000 ang kabuuang halaga ng mga ari-ariang napinsala sa insidente.
Sa kasalukuyan batay sa mga ulat, patuloy ang isinasagawang imbestigasyon ng Bureau of Fire Protection (BFP) at Philippine National Police (PNP) upang matukoy ang eksaktong sanhi ng sunog.
Hawak na rin umano ng pulisya ang lalaking nakunan sa CCTV na bumaba mula sa jeep na pinagmulan ng apoy at agad na lumayo sa lugar, bilang person of interest sa insidente.
Samantala, agad na nagbigay ng tulong ang Barangay Bulaon sa mga apektadong indibidwal, kabilang ang pamamahagi ng damit, kaunting grocery, at tulong pinansyal.
Nanawagan naman si Barangay Captain Lavernie P. Gopez sa publiko na kung may nakakita ng kahina-hinalang kilos o may impormasyong makatutulong sa imbestigasyon, ay makipag-ugnayan agad sa Barangay o sa kinauukulang awtoridad.
Patuloy ang paalala ng mga opisyal sa publiko na maging mapagmatyag at makiisa upang mapanatili ang kaligtasan at kaayusan sa komunidad.
