Ipinahayag ng Automobile Association of the Philippines (AAP) ang pagtutol nito sa panukala ng Department of Transportation (DOTr) na palawigin sa limang taon ang bisa ng rehistro ng mga sasakyan mula sa kasalukuyang tatlong taon.
Sinabi ni AAP President Augustus “Joe” Ferreria na may kaugnayan ang panukala sa mahabang pila sa mga tanggapan ng Land Transportation Office (LTO). Aniya, sa halip na palawigin ang bisa ng rehistro, mas dapat pagtuunan ng pansin ang pagpapabilis ng proseso ng pagpaparehistro ng sasakyan.
Dagdag pa ni Ferreria na umaabot ng kalahating araw ang ginugugol ng mga motorista sa LTO sa tuwing magpaparehistro ng sasakyan. Iminungkahi niya ang pagtatakda ng malinaw na turnaround time sa proseso ng rehistro.
Nagbabala rin si Ferreria na sa ilalim ng limang taong rehistro, maaaring maipon ang mga multa at paglabag sa trapiko. Ipinaliwanag niyang ang mga paglabag sa ilalim ng No Contact Apprehension Policy (NCAP) ay nakatala batay sa sasakyan at hindi sa indibiduwal na drayber.
AAP TUTOL SA 5-TAONG BISA NG REHISTRO NG SASAKYAN; DOTR, IPINALIWANAG ANG PANUKALA
Samantala, sinabi ni DOTr Acting Secretary Giovanni Lopez na mahalaga ang pagtitiyak sa pagiging roadworthy ng mga sasakyan. Sa kanyang pahayag, ang mga bagong sasakyan ay karaniwang may tatlo hanggang limang taong warranty mula sa mga dealer.
Ipinaliwanag ni Lopez na layon din ng panukala na mabawasan ang siksikan sa mga tanggapan ng LTO at mapadali ang proseso para sa publiko. Sa ilalim ng panukala, limang taon ang bisa ng unang rehistro ng bagong sasakyan, at magsisimula ang taunang renewal sa ikaanim na taon.
Target ng DOTr na maglabas ng department order sa Pebrero 15 at makipagpulong sa LTO para sa paglalabas ng memorandum circular kaugnay ng implementasyon ng panukala.
Samantala, inanunsiyo ni Palace Press Officer Claire Castro na “initially approved” na ni Pangulong Ferdinand Marcos Jr. ang panukalang limang taong bisa ng rehistro ng mga bagong sasakyan.
Ayon kay Castro, inaasahang maglalabas ng memorandum ang DOTr para sa pormal na pagpapatupad ng nasabing polisiya.
