POGO HUB—Naglatag ng plano si Senador Bam Aquino na makapagtayo ng 26,000 bagong silid-aralan sa taong 2026 sa tulong ng gobyerno at pribadong sektor.
Layunin nitong wakasan ang school shifts na nagiging dahilan kung bakit madaling-araw pa lamang ay bumibiyahe na ang mga estudyante papasok sa eskuwelahan.
Kabilang sa pangunahing estratehiya ang “repurposing” ng mga binakanteng POGO hub, hindi na ginagamit na BPO offices, at mga nagsarang pribadong paaralan.
Sa pagdinig ng Senate Committee on Basic Education, ibinunyag ang kakulangan na 165,000 classrooms lalo na sa Cavite at Metro Manila.
Dahil dito, maraming mag-aaral ang napipilitang gumising ng 4:00 AM para sa early shifts.
MGA DATING POGO HUB, BPO GAGAWING ESKUWELAHAN
Nagbigay rin siya ng direktang utos sa DepEd, DPWH, at pribadong sektor upang makamit ang target sa 2026.
Inilantad din ang problema sa lupa na nagpapabagal sa konstruksyon kahit may pondo na ang DepEd.
Pinag-aaralan ngayon ang paggamit ng mga kinumpiskang ari-arian ng gobyerno tulad ng dating POGO hubs bilang agarang pasilidad sa edukasyon.
Hinimok niya ang mga ahensya na pabilisin ang legal na proseso na kasalukuyang umaabot ng tatlong taon kada silid-aralan.
Tiwala rin si Sen. Aquino na ang muling pagpapalakas ng Public-Private Partnership ay makatutulong, na aniya ay dapat gawin “sa tamang presyo, sa tamang paraan, at sa tamang panahon.”
Binigyang-babala niya na ang 2026 ang magiging “critical turning point” at hinimok ang lahat na huwag palampasin ang oportunidad upang tuluyang tugunan ang krisis sa edukasyon.
