Patuloy ang pag-ikot ng libreng serbisyo caravan ng Provincial Manpower Training Center and Assessment Center (PMTCAC) sa iba’t ibang bayan ng Nueva Ecija upang maghatid ng libreng masahe, libreng gupit, at libreng manicure sa mga mamamayan.
Sa bayan ng Guimba, maagang dumagsa ang mga residente upang makinabang sa serbisyong layong magbigay ginhawa lalo na sa mga nanay at kababaihan.
Ayon sa pamunuan, bahagi ito ng outreach program na direktang inilalapit sa mga barangay upang hindi na kailangan pang bumiyahe ng mga benepisyaryo.
LIBRENG SERBISYO CARAVAN NG PMTCAC, PATULOY NA NAGBIBIGAY OPORTUNIDAD
Bukod sa libreng serbisyo, hinihikayat din ang mga kabataan at iba pang residente na mag-enroll sa mga kursong technical at vocational na iniaalok ng PMTCAC katuwang ang TESDA.
Samantala patuloy sa pagbibigay ng libreng pagsasanay at oportunidad ang tanggapan sa lalawigan. Patuloy naman ang pasasalamat ng pamunuan sa suporta ng Pamahalaang Panlalawigan sa pagsusulong ng mga programang nakatuon sa kapakanan ng mamamayan.
