Local energy conservation ang naging tugon ng Pamahalaang Panlalawigan ng Bulacan sa nararanasang krisis kaugnay sa kaguluhan sa Middle East.
Dahil sa gyera sa ibang bansa, mabilis na tumataas ang presyo ng petrolyo at kuryente sa buong mundo sa kasalukuyan.
Kasunod nito ay naglabas ng direktiba ang gobernador ng Bulacan upang masiguro na hindi maaapektuhan ang kanilang serbisyo sa mga Bulakenyo.
Alinsunod ito sa Memorandum Circular No. 114 mula sa Malacañang na nag-uutos sa lahat ng ahensya na magtipid sa kuryente at gasolina.
Bilang tugon, inilabas ni Bulacan Governor Daniel Fernando ang Memorandum DRF – 0306026 – 111 o ang “Lokal na Pagpapatupad ng mga Hakbang sa Pagtitipid ng Enerhiya.”
Layunin ng hakbang na ito na bawasan ang “energy footprint” o ang sobrang pagkonsumo ng kuryente sa Pamahalaang Panlalawigan.
Bilang bahagi ng local power conservation, ipatutupad ang four-day onsite work arrangement para sa mga kawani ng Kapitolyo.
Target ng lalawigan na mapababa ng 10% hanggang 20% ang konsumo ng kuryente at gasolina sa bawat opisina.
Bukod dito, ang mga official travel vehicle ng gobyerno ay limitado na lamang sa mga mahahalagang serbisyo.
LOCAL ENERGY CONSERVATION, IPINATUPAD SA LALAWIGAN NG BULACAN
Gagamit din ng mga online at virtual meetings ang mga departamento upang hindi na kailangang bumiyahe nang malayo.
Bukod sa pagtitipid, makatutulong din ang alternatibong paraan ng transportasyon sa pagpasok sa trabaho araw-araw.
Hinihikayat din ang mga kawani na sumali sa “bike-to-work” initiative lalo na ang mga nakatira malapit sa Kapitolyo.
Ang inisyatibang ito ay bahagi ng kampanya para mabawasan ang polusyon at maitaguyod ang isang mas malusog na lifestyle.
Bukod sa pagtitipid, tiniyak ni Fernando na binabantayan din ang presyo ng mga bilihin sa buong lalawigan.
Nakikipagtulungan umano ang Kapitolyo sa Philippine National Police at Department of Trade and Industry upang masigurong walang mapagsamantalang negosyante sa gitna ng kritikal na sitwasyon.
Ayon sa gobernador, prayoridad nila na manatiling patas ang presyo ng pagkain, gasolina, at iba pang pangunahing serbisyo.
Naniniwala ang pamunuan na ang pagbabantay sa merkado ay kasinghalaga ng pagtitipid ng kuryente sa loob ng opisina.
Ayon kay Fernando, kahit maliit na hakbang ito, naniniwala siyang malaki ang ambag nito sa lalawigan at sa buong bansa.
