ANAK, PINATAWAD ANG NANANAKIT NA AMA
Isang kwento ng pagpapatawad ang ibinahagi ni Pastor Michael Samonte sa programang “Count Your Blessings” nina Congresswoman Cherry Umali at Dra. Kit De Guzman.
Ayon kay Pastor Michael, 17 taon na siyang naglilingkod, ngunit bago makakilala Sa Panginoon, ay dumaan siya sa maraming pagsubok.
Kwento niya, lumaki siya sa isang simpleng pamilya kung saan ang kanyang ama ay nangingisda at nagsasaka, habang ang kanyang ina ay nagtrabaho bilang katulong sa isang refugee camp.
Dahil hindi regular ang trabaho ng kanyang ama, ay madalas itong tumatambay at umiinom, dahilan ng mga pagtatalo at pananakit nito sa kanyang ina.
Nagtanim umano ng galit si Pastor Michael sa kanyang ama nang masaksihan niya ang pananakit nito maging sa isa niyang kapatid na minsa’y gumamit ng illegal drugs.
Inamin ni Pastor na dahil sa kanyang mga karanasan, ay hindi niya naiwasang kuwestiyunin Ang Panginoon, at dumating na rin siya sa puntong nais na niyang tapusin ang kanyang buhay.
Hanggang sa isang araw, habang siya’y nanonood ng liga ng basketball, may isang pastor na nangangaral sa halftime, at hindi umano siya interesado noong una, pero bigla na lamang siyang napaluha at naramdaman ang presensya Ng Diyos.
Simula noon, tinanggap na aniya Ang Panginoon at kusang gumaan ang kanyang kalooban, dahilan ng pagkawala ng dinadala niyang galit sa kanyang ama, kaya sa pamamagitan ng isang liham ay ipinahayag niya ang kanyang pagpapatawad na naging simula ng kanilang muling pagkakasundo.
