ANNUAL INVESTMENT PROGRAM NG NUEVA ECIJA PARA SA 2024, PINAGTIBAY NG SANGGUNIANG PANLALAWIGAN
PInagtibay sa 46th Regular Session ng Sangguniang Panlalawigan ang Annual Investment Program para sa 2024 ng lalawigan ng Nueva Ecija, matapos na ipresenta ni Provincial Planning and Development Office (PPDO) Chief Engr. Dennis Agtay ang budget proposal para sa mga proyekto at programa na ninanais na mapondohan sa 2024 sa ginanap na hearing ng Committee of the Whole noong Martes, November 21, 2023.
Alinsunod sa proposed AIP nahahati ang pamamahala ng Provincial Government sa apat na sektor: ang General Public Service na binubuo ng mga departamento na may layuning matugunan ang mga pang-araw-araw na institusyon at probasyon na pangangailangan ng pamahalaang panlalawigan na may proposed budget na Php3, 312, 361, 452 o 5% ng kabuuang halaga ng AIP; Social Service na tumutuon sa pagpapalaganap ng mga serbisyong pangkalusugan, karunungan, trabaho at pagtulong sa mga mahihirap at may kapansanan na may proposed budget na Php2, 997, 235, 485 o 4.75% ng kabuuang halaga ng iminumungkahing pondo; Economic Service na tutugon sa pagpapa-unlad ng agrikultura, turismo, kapaligiran at imprastraktura na may proposed budget na Php58, 952, 461, 214 o 89.79%; at Other service na binubuo ng apat na departamento na may kabuuang halaga ng 392, 419, 880 o 0.60%; na sa kabuuan ay aabot sa Php65, 654, 478, 032.
Sinabi ni Engr. Agtay ay hindi lamang sa 2024 annual budget o pondo ng provincial government iaasa ang lahat ng mga pagawain at programang ito dahil inaasahan nilang makakakuha ng karagdagang panggastos mula sa National Government Agencies.
Kabilang naman sa mga opisinang may pinakamalaking AIP ay ang Provincial Social Welfare and Development Office na may proposed budget na Php1, 269, 196, 711 na ang pangunahing popondohan ay ang mga livelihood program, Lingkod LIngap Program at financial assistance program; ang Provincial Veterinary Office na may proposed budget na Php977, 181, 394 kung saan kabilang sa popondohan ay ang Rapid Response to Livestock Diseases at ang counterpart sa pagpapatayo ng Triple A Slaughter House; ang Department of Tourism na may iminumungkahing pondo na Php645, 871, 273 para sa mga infrastructure projects; at Provincial Health Office na may Php681, 737, 328 kung saan isa sa popondohan ay ang pagpapatayo ng Diagnostic Tertiary Laboratory sa Sta. Rosa.
