DA, TINIYAK NA SAPAT ANG SUPLAY NG BIGAS SA 2024
Kumpiyansa ang Department of Agriculture na sapat ang suplay ng bigas sa kabila ng babala ng grupo ng mga magsasaka na Federation of Free Farmers o FFF na maaaring lumala pa ang mararanasang krisis sa 2024 dahil sa patuloy na pagtaas ng presyo ng mga butil kahit na panahon ng anihan ng palay.
Sinabi ni DA Assistant Secretary at spokesperson Arnel de Mesa, may 20 milyong metric tons na bigas ang bansa mula sa ani ng mga magsasaka bago matapos ang 2023 kaya sapat umano ang suplay nito hanggang sa unang quarter ng 2024.
Dagdag pa ni De Mesa noong Nobyembre ay may 3.03 million metric tons na imported rice ang dumating sa bansa bukod pa dito ang 295, 000 metric tons ng non-basmati white rice mula sa India.
Inamin naman ng DA na hindi nila tiyak kung magpapatuloy pa ang pagtaas ng presyo ng retail ng mga butil.
Ayon naman kay Federation of Free Farmers Chairman Raul Montemayor, makakaranas ang bansa ng kakulangan ng suplay ng bigas sa buwan ng Pebrero at Marso bago ang dry season harvest at sa buwan ng Hulyo hanggang Setyembre ng susunod na taon.
Aniya, sa kabila ng peak season harvest ng palay simula Oktubre, nagkaroon ng pataas na trend ang retail price ng bigas dahil hindi na kasingdami ang ani ng palay ng mga magsasaka ngayon.
Binigyang-diin din ni Montemayor na higit na maaapektuhan ng El Niño phenomenon ang inaasahang pag-aani sa panahon ng dry season cropping sa susunod na taon.
Bukod pa dito ay wala ring aasahang malakihang importasyon ng bigas na papasok sa Pilipinas para punan ang malaking demand ng mamamayan sa bigas.
