Inaprubahan sa 13th regular session ng Sangguniang Panlalawigan sa pangunguna ni Vice Governor Anthony Umali ang kahilingan ni Governor Aurelio Umali na pumirma sa kasunduan sa pagitan ng College for Research and Technology of Cabanatuan City Incorporated (CRT) at Nueva Ecija University of Science and Technology (NEUST) para sa deployment ng kanilang mga kwalipikadong estudyante sa Provincial Government ng Nueva Ecija para sa kanilang Student Internship Program.
Ito ay alinsunod sa Commission on Higher Education Memorandum Order No. 104 series of 2017 Revised Guidelines for Student Internship Program in the Philippines (SIPP) for All Programs.
Nakapaloob sa kahilingan ng CRT na ma-deploy ang kanilang dalawang second year students na may kursong Bachelor of Science in Information Technology sa Governor’s Office ng Provincial Capitol.
Habang ang kahilingan naman ng NEUST ay maideploy ang kanilang BS nursing second year to fourth year students sa Bongabong District Hospital at San Antonio District Hospital upang matutunan ang mga basic skills na kanilang kailangan na may kaugnayan sa kanilang kurso.
Ang internship program ay nagbibigay ng oportunidad sa mga estudyante na ma-i-apply ang kanilang mga natutunan sa loob ng classroom para sila ay magkaroon ng experience sa Host Training Establishment o HTE.
Sa kabilang banda, ang araw kung kailan mag-uumpisa ang OJT program ng dalawang kolehiyo ay naka base sa pag-uusapan ng provincial human resource management at mga eskwelahan.
