GINANG NA MAY PATONG-PATONG NA HOSPITAL BILLS, NATULUNGAN NG PAMAHALAANG PANLALAWIGAN
Isang ginang mula sa Barangay Rizdelis, Cabanatuan City ang nahatiran ng tulong-pinansyal ng Pamahalaang Panlalawigan ng Nueva Ecija sa pamamagitan ng medical and financial assistance ng Malasakit Center.
Ilang araw bago manganak si Asmin S. Naga ay isinugod muna siya sa Eduardo L. Joson Memorial Hospital kung saan na-confine siya doon ng tatlong araw sanhi ng kaniyang mataas na blood pressure.
Pagkapanganak ni Asmin ay naging pangunahing problema ng kaniyang pamilya ang patong-patong na medical at hospital bills na umabot sa halos P50,000.00.
Hindi aniya sapat ang kanilang ipon mula sa pagtitinda sa palengke, kaya naman hindi na sila nagdalawang-isip na lumapit sa kapitolyo sa pamumuno ni Governor Aurelio Umali kaya napagkalooban sila ng medical assistance na P25,000 sa ilalim ng Malasakit Program.
Kaya nagpapasalamat si Asmin sa provincial government dahil sa tulong na natanggap niya, gayundin sa maayos na pagtrato sa kanila sa ELJ Hospital mula sa checkup ng kaniyang noong panahon ng kanyang pagbubuntis hanggang sa panganganak.
