HOUSE BILL NA MAGLALAAN NG ₱5K–₱10K ALLOWANCE SA MGA MAG-AARAL, INIHAIN SA KAMARA
Inihain sa Mababang Kapulungan ang isang panukalang batas na magbibigay ng taunang allowance sa mga mag-aaral mula elementarya hanggang kolehiyo. Sa ilalim ng House Bill 2657 na iniakda ni Parañaque 2nd District Representative Brian Raymund Yamsuan, makatatanggap ng ₱5,000 kada taon ang bawat kuwalipikadong estudyante, habang ₱10,000 naman ang ilalaan para sa mga may natatanging academic performance.
Layon ng panukalang BAON Para sa Estudyante Act na maibsan ang gastusin ng mga pamilya at masiguro na magpapatuloy sa pag-aaral ang mga kabataang Pilipino. Sakop nito ang mga nasa pampubliko at pribadong paaralan, gayundin ang mga nasa Alternative Learning System o ALS.
Sinabi ni Yamsuan, maaaring malaki ang pondong kailangan para sa programa, ngunit mas mahalaga umano ang pangmatagalang benepisyong maidudulot nito sa bansa sa pamamagitan ng paglikha ng higit na edukadong mamamayan. Nakapaloob sa panukala ang pag-aaral sa posibleng tiered system batay sa income bracket upang mas mabigyang-prayoridad ang mga estudyanteng higit na nangangailangan.
DepEd ang mangangasiwa sa implementasyon para sa elementarya hanggang senior high school, habang CHED naman ang tututok sa antas-kolehiyo. Ibibigay ang stipend tuwing simula ng school year at sisikaping maging simple at mabilis ang proseso ng pagkuha nito.
Base sa pinakahuling datos ng DepEd, tinatayang 24.9 milyong mag-aaral sa basic education ang posibleng makinabang sakaling maipasa ang panukalang batas.
Samantala, isinusulong din ni Batangas 1st District Representative Leandro Legarda Leviste ang pagbibigay ng ₱1,000 national student allowance para sa lahat ng mag-aaral mula kindergarten hanggang kolehiyo. Nakapaloob ito sa kanyang inihaing House Bill No. 27 o National Student Program Act, na layong magbigay ng regular at tuloy-tuloy na pinansiyal na suporta sa mga mag-aaral sa buong bansa.
Bagama’t hindi pa naipapasa bilang batas ang ₱1,000 national allowance, mayroon nang lokal at pribadong pinondohang bersyon ng programa na kasalukuyang ipinatutupad sa distrito ni Leviste sa Batangas, kaya nakakatanggap na ng tulong ang ilang estudyante roon.
