Sinalubong ng makulay na street dance pati na rin mga Philippine folk dances katulad ng tinikling, subli, courtship dance at pandanggo sa ilaw ang halos 50 American volunteers ng Globe Aware.
Ang Globe Aware ay isang Non-Government Organization na binubuo ng 50 American Volunteers, kung saan nagsasagawa sila ng mga Bayanihan Event o projects na may kinalaman sa pagseserbisyo sa mga tao.
Nagtungo ang mga volunteers kasama ang Executive Director at Founder ng Globe Aware na si Kimberly Haley-Coleman sa bayan ng Sta. Rosa, Nueva Ecija upang magtayo ng tahanan para sa ilang residente at school learning hub sa paaralan ng Sto. Rosario National High School.
Mahalaga umano ang pagkakaroon ng maayos na student hub sa mga paaralan sapagkat ito ang magsisilbing komportableng lugar ng mga mag-aaral upang magpahinga o magbasa.
Labis naman ang pasasalamat ng mga mag-aaral maging ang mga guro ng nasabing paaralan, sapagkat sila ang napili na bigyan ng school learning hub.
Samantala, ayon sa founder ng Globe Aware, layunin ng kanilang organisasyon na magbigay ng pag-asa at inspirasyon sa mga mamamayan na may mga tao pa rin sa buong mundo na naglalakbay ng libu-libong milya upang iparating ang diwa ng Bayanihan lalo na ngayong panahon ng kapaskuhan.
