BABALA! SENSITIBONG BALITA:
KAPULISAN SA NUEVA ECIJA, ISINAILALIM SA FULL ALERT STATUS NGAYONG ELEKSYON 2025
Bilang paghahanda sa National and Local Elections (NLE) 2025, nagsanib-puwersa ang Nueva Ecija Police Provincial Office (NEPPO) at 703rd Infantry Brigade ng Philippine Army upang tiyakin ang seguridad sa lalawigan.
Sa isang seremonyang ginanap noong May 3, 2025, opisyal na tumanggap ang NEPPO ng karagdagang pwersa mula sa 703rd Brigade. Ang hakbang na ito ay bahagi ng mas pinaigting na kampanya para sa mapayapang halalan sa buong Nueva Ecija.
Ang mga grupo ng militar ay itatalaga sa mga checkpoints, election watchlist areas, at mga lugar na may kasaysayan ng tensyon tuwing halalan. Kasabay nito, isinailalim na sa full alert status ang buong pwersa ng NEPPO upang matiyak ang mabilis na pagtugon sa anumang insidente ng karahasan, pananakot, o ilegal na aktibidad sa panahon ng halalan. Sa ilalim ng full alert status, kanselado ang lahat ng leave ng mga pulis at naka-deploy ang buong pwersa sa kani-kanilang assignment.
Bilang bahagi ng peace and order campaign ng kapulisan, personal na namagitan si PCOL Ferdinand D Germino, Provincial Director ng NEPPO, sa umiigting na tensyon sa pagitan ng mga lokal na kandidato sa bayan ng Cabiao. Isinagawa ito upang paalalahanan ang mga kandidato sa kahalagahan ng mapayapang eleksyon at pagpapanatili ng katahimikan sa komunidad. Layunin nitong maiwasan ang eskalasyon ng anumang alitan na maaaring mauwi sa karahasan.
Sa kabila ng mga hakbang pangseguridad, isang insidente ng pamamaril ang naganap noong April 28, 2025 sa Barangay San Fernando Norte, Cabiao. Sa isang panayam, sinabi ni Angelito “Angel” Dela Cruz, dating bise alkalde at tumatakbong konsehal, na siya ay tinambangan ng dalawang hindi pa nakikilalang lalaki na sakay ng motorsiklo habang siya ay nagmamaneho ng kanyang sasakyan sa kahabaan ng Jose Abad Santos Avenue.
Nakaligtas si Dela Cruz at walang tinamong pinsala. Patuloy na iniimbestigahan ng Cabiao Municipal Police Station ang insidente upang matukoy ang pagkakakilanlan ng mga salarin at ang kanilang motibo.
Sa kasalukuyan, patuloy ang mahigpit na koordinasyon ng NEPPO at 703rd Brigade upang matiyak ang kaligtasan ng bawat botante sa darating na halalan. Kabilang dito ang pagsasagawa ng masinsinang checkpoint operations, information drives sa mga komunidad, at intelligence monitoring upang maagapan ang anumang banta sa kapayapaan.
