Laking pasasalamat ng administrasyon ng Manuel V. Gallego Colleges sa Cabanatuan City dahil sa pagpayag ng Tricycle Operators and Drivers Association na kinse pesos lang bawat isang estudyante ang kanilang singilin sa pamasahe mula sa nasabing eskwelahan papuntang N.E Pacific Mall at Crossing vice versa.
Ayon kay Maricris Malamug, Student Affairs Director ng MV Gallego, dalawampong taon nang namamasada at nagseserbisyo sa mga mag-aaral, kaguruan, at empleyado ng kanilang paaralan ang nasabing TODA.
Paliwanag ni TODA President Julian Aberin, may kikitain pa rin naman sila sa singil na kinse pesos kada isang estudyante, basta isang byahe ay tatlo ang kanilang sakay na papatak sa P45.00 ang kabuuang bayad sa pamasahe.
Tinatayang nasa bente pesos lang ang magiging konsumo sa gasolina na nasa P60.00 na ang presyo kada litro ng isang tricycle na Bajaj ang motor galing ng MV Gallego patungong Pacific at Crossing Cabanatuan na tinatayang nasa mahigit kumulang anim na kilometro.
Malaking katipiran naman ito para sa mga pasahero dahil simula nang magtaas ang halaga ng mga produktong petrolyo ay sumunod nang tumaas ang pamasahe sa mga pampublikong transportasyon kung saan sa Cabanatuan City ay uso na nangongontrata ang mga tricycle drivers bawat byahe at kada pasahero ay naglalaro na sa P25.00- P30.00 isang sakay, at P60.00 ang kontrata bawat byahe.
Pangako naman ng MV Gallego Colleges TODA na hangga’t may pasok at dumaranas pa ng kahirapan ang taumbayan sanhi ng pandemyang COVID-19 ay mananatili ang mababang singil nila sa pamasahe.
