KONDUKTOR NA INIWAN NG BUS, BABALIKAN PA KAYA?
Naranasan nyo na ba ang magmahal at masaktan dahil iniwan? Pero paano kung sa pagsakay mo ng bus ay bigla ka nalang iniwan, okay lang sana humanap uli ng bagong masasakyan kaso lang konduktor ka nung bus na nang-iwan sayo?
Laughtrip ang naging hatid sa mga netizen ng ibinahaging mga larawan ng pasahero ng bus na si Jimmuel Hilo Danaytan sa kanyang Facebook, kasi naman sa lahat ng maiiwan ng driver ay ang konduktor pa niya mismo ang nakalimutan.
Ayon sa post ni Jimmuel, galing Manila ay narating na nila ang Cabangan, Zambales kung saan siya pumara at nang bumaba na ay kasunod nito ang konduktor para ibaba ang kanyang mga bagahe na inilagay sa compartment ng bus.
Hindi pa man aniya nabubuksan ng konduktor ang compartment ay bigla nang umandar ang bus papaalis, sa halip na mag-alala sa kanyang mga bagahe na kasama ding natangay ng bus ay pigil na pigil daw siya sa kanyang pagtawa dahil sa galit na itsura ng naiwang konduktor.
Sa isang panayam ay sinabi ni Jimmuel na sinubukang habulin ng konduktor ang kanilang sinakyan pero hindi na nito nahabol kaya naman isang naka-motor ang tumulong na humabol sa bus para sabihing naiwan nito ang kanyang konduktor.
Ilang saglit naman daw ay bumalik ang naka-motor at isinasakay na ang konduktor para ihatid sa bus pero sagot daw nito “sunduin niya ako dito, hayaan mo siyang bumalik dito”, bagay na ginawa naman ng driver.
Tawang-tawa din naman daw ang driver at iba pang pasahero dahil sa nangyari at humingi na rin ng dispensa kay Jimmuel.
Dagdag ni Jimmuel baka dala din ng pagod sa byahe kaya hindi na namalayan ng driver na naiwan na pala ang kasama nito at hindi rin naman daw makakaapekto sa kanilang trabaho ang nakakatawang pangyayaring ito.
Aabot na sa mahigit 100 thousand reactions, 7.4 thousand comments at 65 thousand shares ang post na ito ni Jimmuel at inulan din ng mga hugot at nakakatawang comments.
Ilan sa mga netizen ang nagbiro na wala na daw talagang safe ngayon dahil ang dating mga driver na sweet lover ay natuto na din ngayong mang-iwan.
Marami din ang napasana all binabalikan at sana all importante dahil sabi nga ng isa pa ay kapag importante kja babalikan ka talaga.
