MABABANG KALIDAD NG PAGTUTURO NG MGA GURO, MAY KAUGNAYAN UMANO SA HIRAP SA PAG-AARAL SA PILIPINAS

MABABANG KALIDAD NG PAGTUTURO NG MGA GURO, MAY KAUGNAYAN UMANO SA HIRAP SA PAG-AARAL SA PILIPINAS

Natuklasan sa report ng World Bank na ang kakulangan sa kaalaman at kakayahan ng mga guro at ang kanilang pagliban sa klase ang ilan sa mga sanhi kaya mataas ang porsiyento ng kahirapan ng pag-aaral sa Pilipinas.

Sa ulat ng World Bank na “Fixing the Foundation: Teachers and Basic Education in East Asia and Pacific”, inihayag na ang mga guro sa Pilipinas ay gumagamit ng isa sa mga pinaka-hindi epektibong pamamaraan ng pagtuturo sa buong Southeast Asia.

Lumabas na 40% ng mga mag-aaral sa bansa ang nagsabing mayroon silang mga guro na minsan o madalas ay wala sa klase.

Ayon sa World Bank, ang pagliban sa klase ng mga guro pati na rin ang mahinang pamamahala sa mga silid aralan ang ilan sa mga negatibong nakakaapekto sa pag-aaral ng mga mag-aaral.

Nadiskubre rin na 66% ng mga guro sa Pilipinas ang mayroong “medium-low” na paggamit ng epektibo at nakasanayang paraan ng pagtuturo, habang 19% naman ang nasa “low” at 15% lamang ang may “medium-high”.

Binanggit din sa ulat na ang pagiging guro ay naaapektuhan din ng mga problema katulad ng mababang sweldo at kakulangan sa pag-unlad ng propesyon ng pagtuturo.

Sa inilabas na ulat ng World Bank noong 2022, nasa 91% ang learning poverty sa Pilipinas, na nangangahulugang siyam sa sampong bata na may edad sampo ang nahihirapang magbasa ng simpleng teksto.

Samantala, kabilang pa rin ang Pilipinas sa walong bansa na nagrehistro ng learning poverty rate na mas mataas sa two-thirds, o 67 percent, sa kabila ng pagbabalik ng face to face classes sa mga paaralan noong November 2022.