Matagumpay na idinaos ng Pamahalaang Panlalawigan ng Nueva Ecija, sa pamamagitan ng Provincial Tourism Office, ang pagdiriwang ng National Arts Month sa Old Capitol, Cabanatuan City, na may temang “Ani ng Sining, Katotohanan at Giting”.
Ang nasabing aktibidad ay isinagawa bilang pakikiisa sa pambansang pagkilala sa sining tuwing buwan ng Pebrero upang ipamalas ng mga alagad ng sining ang yaman ng Kultura at talento ng lalawigan.
Sa pangunguna ni Bb. Jan Mara Stefan C. San Pedro mula sa Tourism Office, binigyang-diin ang suporta nina Governor Aurelio “Oyie” Umali at Vice Governor Gil Raymond “Lemon” Umali sa paghubog ng kakayahan ng mga kabataan sa larangan ng pagpipinta at panitikan.
Pangunahing layunin ng programa na magbigay ng inspirasyon at dagdag na kaalaman sa mga kalahok sa pamamagitan ng mga art session, kung saan tinuruan sila sa pagpapaunlad ng kanilang mga likha at maibahagi ito sa kanilang mga paaralan at buong bansa.
Naging katuwang sa nasabing okasyon ang mga tanyag na “puno ng sining” kabilang sina G. Elito “Amang Pintor” Sirca, G. Armando Heron, at ang Master of Watercolor in the Philippines na si G. Rafael “Popoy” Cusi.
Nilalahukan ang kompetisyon ng 20 estudyante para sa painting at 17 estudyante para sa spoken poetry mula sa iba’t ibang panig ng lalawigan.
Ang mga nagwagi ay nag-uwi ng mga premyo: 30,000 pesos para sa unang gantimpala, 15,000 pesos sa ikalawa, at 10,000 pesos sa ikatlo, at tumanggap naman ng consolation prizes ang mga di pinalad manalo.
Sa Spoken Poetry, itinanghal na kampeon si Jocele Andrey C. Dee mula sa Nueva Ecija University of Science and Technology (NEUST).
Sa pamamagitan ng kanyang sariling pyesa na pinamagatang “Baliw,” tinalakay niya ang kahalagahan ng mga obrang madalas ay hindi napapansin ng lipunan.
Ayon sa kanya, ang napanalunang premyo ay malaking tulong upang matustusan ang gastusin sa kanyang akademikong research na kasalukuyang kulang sa badyet.
Sa Painting contest, nakuha ni Yuri mula sa Bongabon National High School ang unang puwesto. Ang kanyang obra na pinamagatang “Amang, Inang, at si Nening” ay nagpapakita ng isang huwarang pamilya ng mga magsasaka na puno ng pagmamahalan at suporta sa kabila ng mga pagsubok sa buhay.
