Nabunyag noong Abril 2018, ang madilim na katotohanan sa likod ng tinatawag na NewG Bitcoin operation sa Pilipinas. Sa umpisa, inakala itong isang makabagong cryptocurrency investment scheme. Gayunpaman, kalaunan ay napatunayang isa itong pyramid at Ponzi scam na sumira sa kabuhayan ng maraming biktima.
Sa imbestigasyon ng mga awtoridad, nadiskubre na pinamunuan ang ilegal na operasyon ng mag-asawang Arnel at Leonady Ordonio. Kalaunan, sila ay naaresto ng PNP–Criminal Investigation and Detection Group (CIDG) sa isang entrapment operation.
Bagaman rehistrado ang “NewG” sa Department of Trade and Industry (DTI), computer shop lamang ang nakasaad at wala silang ahintulot na mangolekta ng puhunan mula sa publiko.
Paano Nalinlang ang mga Biktima ng NewG
Samantala, ginamit ng mag-asawa ang isang binary network na kahalintulad ng pyramid scheme. Nangako sila ng 30% return on investment tuwing 15 hanggang 16 na araw. Isang alok na sobrang ganda, na kaduda-dudapara maging totoo.
Sa simula, may ilang investors na talagang kumita. Subalit, ang mga unang bayad ay nagsilbing pain lamang upang palakasin ang tiwala. Sa bandang huli, bumagsak ang sistema at naglaho ang pera ng mga namuhunan.
Ayon sa ulat, mahigit 50 biktima ang naloko, na may kabuuang halagang humigit-kumulang ₱900 milyon, at posibleng umabot pa sa ₱2 bilyon kung isasama ang mga biktimang hindi nagsalita.
Dahil dito, kinasuhan ang mag-asawa ng syndicated estafa, at isinasaalang-alang pa ng mga awtoridad na ituring ito bilang economic sabotage.
Aksyon ng Senado
Kasunod nito, naglabas ng opisyal na babala ang Securities and Exchange Commission (SEC) laban sa mga unregistered investment schemes na nangangako ng tiyak at mabilis na kita, na isang malinaw na palatandaan ng Ponzi scam.
Bukod dito, nanawagan si Senador Leila de Lima na pabilisin ang mga panukalang batas ukol sa cryptocurrency regulation upang maiwasan ang paggamit nito sa mga ilegal na gawain.
Sa huli, ang NewG Bitcoin Scam ay nagsilbing matinding babala sa publiko. Kapag ang isang investment ay nangangako ng mabilis at garantisadong kita, magduda agad. Dahil kadalasan, ito ay isang bitag.
