Nueva Ecija Drug Treatment and Rehab Center, pinuri ni DDB USec Gilberto DC Cruz
Pinuri ni Dangerous Drug Board UnderSecretary Gilberto DC Cruz ang pagkakatatag ng Nueva Ecija Drug Treatment and Rehabilitation Center na nasa Brgy. Ganaderia, Palayan City, sa ginanap na Drug Summit sa Convention Center, noong Biyernes, August 5, 2022.
Sa talumpati ni USec. Cruz ay sinabi nitong nakita niya ang puso sa paglilingkod ng Pamahalaang Panlalawigan sa pamamagitan ng drug rehab na ito upang matulungan ang mga kababayang nalulong sa droga.
Aniya, nagkakaloob sila ng Php5-Million hanggang Php10-Million sa mga Local Government Units na nakikiisa sa kampanya ng pamahalaang nasyunal kontra droga at tumutulong sa mga nalihis ng landas dahil dito.
Sa inisyatibo ng Pamahalaang Panlalawigan na pondohan at itayo ang rehabilitation center upang tugunan ang panawagan ni dating Pangulong Rodrigo Duterte na labanan ang iligal na droga at sa pakikipag-ugnayan ng Ako ang Saklay Incorporated ay inihayag ni USec. Cruz na kabilang ang lalawigan ng Nueva Ecija sa kanilang susuportahan at pagkakalooban ng tulong pinansyal para sa mas lalo pang ikabubuti ng serbisyo ng naturang pasilidad.
Nagpahayag din ito ng paghanga sa vision at mission ng proyekto at sinabing maituturing na number 1 ang Nueva Ecija Drug Treatment and Rehabilitation Center pagdating sa Provincial level.
Sa mensahe naman ni Vice Governor Anthony Umali ay sinabi nitong mula noon hanggang ngayon ay malinaw ang kanilang tindig at pangarap ni Governor Aurelio Umali na mailayo sa iligal na droga ang mamamayan ng lalawigan.
Dumaan man sa napakaraming pagsubok ang probinsya ay sinikap pa ring sugpuin ang illegal na droga sa pakikipagtulungan ng iba’t ibang ahensya ng gobyerno ngunit hindi aniya natatapos sa paghuli sa mga ito ang obligasyon ng pamahalaang panlalawigan kundi ang maibalik sila sa kanilang mga pamilya para magbagong buhay.
Sa datos na iprinesenta sa ilalim ng Barangay Drug Clearing Program out of 849 barangays sa lalawigan ng Nueva Ecija ay nasa 614 barangays na ang drug cleared at nasa 195 pa ang natitirang drug affected barangays.
