NUEVASOL BONGABON SOLAR POWER PROJECT, MAGBIBIGAY NG PONDO SA LALAWIGAN
Pinagtibay sa 15th Regular Session ng Sangguniang Panlalawigan ng Nueva Ecija ang kahilingan ni Governor Aurelio Umali na lumagda sa isang kasunduan o Memorandum of Agreement (MOA) sa pagitan ng pamahalaang panlalawigan at Nueva Sol Energy Corporation.
Ang kasunduan ay may kinalaman sa pagtanggap ng bahagi ng kita ng lalawigan mula sa proyektong Bongabon Solar Power Plant, isang malaking solar energy project sa Nueva Ecija.
Ayon sa Department of Energy Circular No. 2018-08-0021, karapat-dapat tumanggap ang mga host communities ng pondong tinatawag na Development Livelihood Fund (DLF) at Reforestation, Watershed Management, Health, and/or Environment Enhancement Fund (RWMHEEF).
Upang mas maipaliwanag ang kasunduan, tumayo bilang resource person si Provincial Treasurer Isabel Galila.
Nilinaw ni Vice Governor Anthony Umali ang nakasaad sa kasunduan kung kasama na ba agad ang pagbubukas ng mga account o kailangan pa itong aprubahan sa ibang pagkakataon.
Naalala rin ng ilang opisyal na may nauna nang kaparehong proseso noong nakipagkasundo ang lalawigan sa ibang solar company, gaya ng Greentech, kung saan sabay na inaprubahan ang MOA at pagbubukas ng account.
Bukod dito, napag-usapan din ang tungkol sa pagbabago ng buwis sa lupa (real property tax o RPT) para sa mga lupang ginamit sa solar project.
Kapag na-reclassify ang lupa bilang industrial, tataas ang bayad sa buwis.
Ngunit ayon sa assessor’s office, kailangan pa ring magsumite ng mga dokumento ang may-ari ng lupa kahit may reclassification na galing sa sanggunian.
Ang proyektong Bongabon Solar Power Plant ay inaasahang makatutulong sa lokal na ekonomiya at sa mga programang pangkalikasan ng lalawigan sa pamamagitan ng malinis na enerhiya at mga pondong maibabahagi sa probinsya.
