NURSE, CAREGIVER, AYAW IWANAN ANG PASYENTE, NADAMAY SA PAG-ATAKE NG HAMAS SA ISRAEL
Kinumpirma ng Department of Foreign Affairs na tatlong Pinoy ang namatay dahil sa pag-atake ng militanteng grupo na Hamas sa Gaza Strip sa Israel noong Sabado, October 14.
Inanunsiyo ng DFA na ang mga Pinoy na nasawi ay matagal nang nagtatrabaho bilang caregiver at nurse sa bansang Israel.
Ang 42-anyos na lalaki na si Paul Vincent Castelvi na nakatira sa Pampanga at 33-anyos na babae na si Angelyn Aguirre mula sa Pangasinan ang unang naiulat na nadamay sa kaguluhan habang kasama ang kanilang inaalagaang pasyente.
Sa isang briefing sa Palasyo ng Malakanyang, sinabi ni Philippine Labour Attaché Rudy Gabasan na isa sa kumpirmadong namatay ay binaril ng militanteng Hamas nang pinasok nito ang kanilang bahay sa komunidad ng kibbutz sa Israel malapit sa border ng Gaza.
Ang Pinay nurse naman na si Angelyn ay itinuturing bayani dahil sa nasawi siyang lumalaban habang binabaril ayon sa pahayag ng kanyang amo.
Sinabi naman ni Foreign Affairs Undersecretary Eduardo de Vega, isang 49-anyos na babae ang pinakahuling Filipino na nasawi na tubong Negros Occidental.
Nangako naman ang ilang ahensiya ng gobyerno na tutulungan ang mga naiwang pamilya ng tatlong OFW tulad na lamang ang Overseas Workers Welfare Administration (OWWA) na magkakaloob ng tig P200, 000.
Bukod dito ay magbibigay din ng tig- P50, 000 na ayuda ang Presidential Communications Office (PCO) na ipinahahanda ni Pangulong Ferdinand Marcos Jr.
Sasagutin din ng OWWA at DMW ang wake at burial assistance na aabot sa P20, 000 pati na ang repatriation at transportation costs ng mga bangkay mula airport hanggang sa kanilang mga tahanan.
Bibigyan din ng educational at livelihood assistance ang mga anak ng mga nasawing OFW maging ang medical at psychological support na pangungunahan ng Department of Health.
