PAGBAWI NG PRANGKISA NG LTFRB, PINALAGAN NG TRANSPORT GROUP

Sinaklolohan ng transport group na Pinagkaisang Samahan ng Tsuper at Operators Nationwide (Piston) ang mga jeepney driver at operator na namumurong tanggalan ng prangkisa dahil sa pag­lahok sa dalawang araw na tigil-pasada upang iprotesta ang umano’y talamak na korapsiyon sa Land Transportation Franchising and Regulatory Board (LTFRB).

Nagbanta na ang LTFRB na magpapalabas ng show cause order laban sa mga miyembro ng Manibela na siyang nagsagawa ng jeepney strike noong nakaraang Lunes.

Ayon sa Piston, may karapatan ang mga jeepney driver na mag­daos ng strike para mailabas ang hinaing nila sa gobyerno, partikular sa LTFRB.

Imbes na pakinggan umano at tugunan ang mga panawagan ng mga tsuper at operator, kung bakit humahantong sa welga ang kanilang mga reklamo, mukhang mas gusto raw talaga ng gobyerno na atakehin ang kabuha­yan at mga karapatan ng mga manggagawa, ayon sa grupo.