PAGTUTURO NG WIKANG BANYAGA SA KOLEHIYO, ISINUSULONG NI SEN. JINGGOY ESTRADA

PAGTUTURO NG WIKANG BANYAGA SA KOLEHIYO, ISINUSULONG NI SEN. JINGGOY ESTRADA

Bukod sa Ingles, dapat ding isama sa curriculum sa kolehiyo ang Foreign language elective courses ayon kay Senator Jinggoy Ejercito Estrada.

Ito ang nakapaloob sa inihaing Senate Bill No. 2341 ng senador upang maihanda ang mga mag-aaral na maging linguistically at culturally diverse. Sa paraang ito, magkakaroon ng sapat na kaalaman at kakayahan ang mga Pilipinong mag-aaral na naaangkop sa ika-21 siglo.

Sinabi ni Estrada na magiging madali sa mga Pilipino na makipag-ugnayan sa buong mundo at magiging globally competitive kumpara sa ibang mag-aaral na sasabak sa trabaho.

Sa ilalim ng kanyang iminungkahing Foreign Language Education Act, aatasan ang Commission on Higher Education (CHED) na gumawa at magpatupad ng programa na mag-aalok ng tatlong unit na basic foreign language courses sa mga beginners sa lahat ng higher education institutions.

Binigyang-diin nito na ang pagkakaroon ng kurso na dayuhang wika sa curriculum sa kolehiyo ay magsisilbing elective course lamang at hindi papalitan ang Filipino bilang core subject.

Ang nasabing panukala ay may layuning ipagpatuloy ang special program sa foreign language classes na kasalukuyang ipinapatupad ng Department of Education o DepEd sa mga pampublikong paaralan sa mga mag-aaral sa Grade 7 hanggang Grade 12.

Nagsimula ang programa noong 2009 sa mga piling paaralan at nag-aalok lamang ng Spanish language ngunit kalaunan ay pinalawak pa at isinama ang Nihongo, French, German, Mandarin at Korean.