PAPALUGING SARI-SARI STORE SA GABALDON, MULING NAKABANGON DAHIL SA LIVELIHOOD ASSISTANCE NG KAPITOLYO
Muling nakabangon ang papalugi na sanang sari-sari store ni Christine Manzano ng Brgy. Bagting, Gabaldon, Nueva Ecija dahil sa livelihood assistance na ipinagkaloob ng Pamahalaang Panlalawigan sa kanila.
Ayon kay Christine, sa hirap ng buhay ay nahirapan silang masustenahan ang paninda ng kanilang tindahan at wala nang maipuhunan dahil umaaasa lamang sila sa pagtatanim at paglalako ng kaunting gulay.
Dito din nila kinukuha ang pangsuporta para sa pag-aaral ng kanilang mga anak maliban pa sa pinagkukunan ng kanilang pang-araw-araw na pangangailangan.
Sa tulong aniya ng sampong kabang bigas at mga groceries na inihandog sa kanila ng programa ni Governor Aurelio Umali at Vice Governor Anthony Umali ay muling sumigla at nagkabuhay ang kanilang tindahan na kasalukuyan nilang pinalalago.
Hiling ni Christine na sana ay magpatuloy ang ganitong programa ng provincial government upang mas marami pang mga Novo Ecijano ang kagaya nila ang mabigyan ng pagkakataon na magkaroon o maipagpatuloy ang maliit na negosyo para sa kanilang hanapbuhay.
Nagpaabot din ng pasasalamat si Christine sa pamahalaang panlalawigan dahil sa patuloy na pagbaba ng mga programang nakatutulong upang masustenahan ang pangkabuhayan ng bawat pamilyang Novo Ecijano.
