PAYOUT NG MAHIGIT 700K BENEPISYARYO NG 4Ps, BALIK PROSESO NA NGAYONG NOBYEMBRE

PAYOUT NG MAHIGIT 700K BENEPISYARYO NG 4Ps, BALIK PROSESO NA NGAYONG NOBYEMBRE

Magsisimula na ngayong Nobyembre na makuhang muli ng mga miyembro ng Pantawid Pamilyang Piipino Program ang kanilang payout makaraang maibalik sa listahan matapos ang isinagawang re-assessment ng Department of Social and Welfare Development.

Sinabi ni DSWD Usec. Edu Punay na mula sa 1,158,249 miyembro na natukoy na non-poor sa listahan ng ahensiya, lumalabas sa kanilang pag-aaral na nasa 761,150 na benepisyaryo ay mahirap pa rin at nangangailangan ng patuloy na assistance sa ilalim ng programa.

Sa isinagawang media forum, nilinaw ni 4Ps National Program Manager Director Gemma Gabuya, ipinoproseso na ng kanilang pamunuan ang pagbabalik ng grants o payout mula Enero hanggang Setyembre ngayong taon.

Ang 339,660 na nasa self-sufficient level na o maituturi nang hindi na mahihirap ay maaari namang maka-avail ng exit program sa kani-kanilang Local Government Unit para sa tuluy-tuloy na ayudang matatanggap sa pamahalaan.

Sa Nueva Ecija, ayon kay Provincial Partnerships Officer Christer Carandang, hinihintay na lamang ng kanilang tanggapan ang official memorandum na manggagaling sa nasyunal upang maibigay ang payout sa pagbabalik ng 23,665 Novo Ecijanong miyembro na nai-tag na non-poor ng ahensiya.

Ibinalita rin ni Carandang na mayroong 14,245 pamilyang Novo Ecijano ang aabisuhan ng DSWD-NE sa mga susunod na araw. Sila ay ililipat na sa level 3 o kategoryang self-sufficient ng DSWD na awtomatikong inirerekomenda para sa graduation o exit mula sa programa.

Base Republic Act 11310 o 4Ps Act at DILG-DSWD Joint Memorandum Circular 2022-001, ang mga magsisipagtapos sa programa ay nasa pangangalaga na ng mga LGU. Sila ay imo-monitor sa loob ng isang taon at maaari pa ring makakuha ng ilang programa sa DSWD tulad ng Sustainable Livelihood Program at Assistance to Individuals in Crisis Situation o AICS na ibinababa sa bawat LGU.

Asahan din ng mga Novo Ecijano na mayroong panibagong set na mga benepisyaryo ang kanilang ia-asses dahil mahigit labing-apat na libo ang matatanggal sa kanilang listahan.