Ipinag-utos ni Pangulong Ferdinand R. Marcos Jr. ang pagpapalawak ng zero balance billing (ZBB) upang masaklaw hindi lamang ang mga indigent patients kundi pati ang mga middle-class contributors ng Philippine Health Insurance Corporation o PhilHealth.
Sa pahayag ni Presidential Communications Office Undersecretary at Palace Press Officer Claire Castro, layunin ng direktiba ng Pangulo na matiyak na ang mga kontribusyon sa PhilHealth ay nagiging direkta at ramdam na benepisyo para sa mga miyembrong regular na nagbabayad ng premium.
Sinabi ni Castro na bilang tugon sa direktiba ng Pangulo, nakipag-ugnayan si Executive Secretary Ralph Recto sa pamunuan ng Department of Health at PhilHealth upang palawakin ang saklaw ng zero balance billing at iba pang benepisyo.
Sa isang pulong noong Enero 20, hinimok ni Recto sina DOH Secretary Teodoro Herbosa at PhilHealth President at CEO Edwin Mercado na palawakin ang benefit packages, lalo na para sa mga middle-income contributors.
PBBM: ZERO BALANCE BILLING, PALALAWAKIN PARA SA MIDDLE CLASS; RECTO HINIMOK ANG DOH, PHILHEALTH
Binigyang-diin ni Recto na dapat makatanggap ng benepisyong katumbas ng kanilang kontribusyon ang mga Pilipinong regular na nagbabayad ng buwis at PhilHealth premiums.
Tinalakay rin sa pulong ang pagpapalakas ng zero balance billing, na naglalayong alisin ang out-of-pocket expenses ng mga pasyente sa mga ospital ng pamahalaan, at ang pagtugon sa mga kakulangan sa coverage na patuloy na nagpapabigat sa gastusin ng mga pamilya.
Samantala, iniulat ng DOH na nasa huling yugto na ng pagbuo ang Healthcare Provider Network model. Layunin nito na palakasin ang kakayahan ng mga local government units sa pagbibigay ng mas mataas na antas ng serbisyong medikal at mapabuti ang referral system sa ilalim ng Universal Health Care Law.
Inihayag ni Recto na mahalaga ang mas malapit na koordinasyon ng mga national agencies at LGUs upang matiyak na ang mga reporma sa healthcare financing ay magdulot ng konkretong benepisyo sa mga pasyente mula sa iba’t ibang antas ng kita.
