PHILHEALTH CONTRIBUTIONS, NAKAAMBANG TUMAAS SA 2024
Nakaambang tumaas ang kontribusyon ng mga miyembro sa Philippine Health Insurance Corporation o Philhealth na magsisimula umano sa susunod na taon.
Sinabi ni acting Vice President of the Corporate Affairs Group Rey Balena, alinsunod sa Republic Act 11223 o Universal Health Care Act ay itinakda ang karagdagang kontribusyon sa premium rate ng mga miyembro simula 2019 hanggang 2025.
Batay sa schedule, may umento na 5 percent ang contribution rate mula sa kasalukuyang 4 percent ng buwanang kita.
Ipinaliwanag ng Philhealth na hindi lahat ay sagot ng mga mangagawa dahil ang kalahati sa kontribusyon ay manggagaling sa employer.
Habang iba naman umano sa mga voluntary member at Overseas Filipino Worker dahil sila mismo ang nagbabayad ng kanilang premium contributions sa ahensiya.
Kasabay naman aniya ng pagtaas ng kontribusyon ay ang pagpapahusay sa coverage plan nito kabilang ang pagpapalawak ng mga session ng hemodialysis mula sa 90 session ay magiging 156 na. Tumaas din ng higit 100% ang coverage sa acute stroke at ang bagong outpatient mental health package.
