PNP, NAKA FULL ALERT PARA SA “TRILLION PESO MARCH 2.0”
Nakahanda na ang Philippine National Police (PNP), para siguruhin ang seguridad sa nalalapit na “Trillion Peso March 2.0” sa November 30, 2025.
Simula nitong November 28, isinailalim na sa Full Alert ang National Capital Region Police Office (NCRPO) upang masiguro ang pinakamataas na antas ng presensya ng pulisya at ang mabilis na pagmomobilisa kung kinakailangan.
May kabuuang 15,097 na tauhan ng pulisya ang ide-deploy upang matiyak ang seguridad at maayos na daloy ng aktibidad. Kabilang dito ang 8,805 personnel mula sa NCRPO at Regional Support Units (RSUs) at 6,292 augmentation forcesmula sa iba’t ibang Police Regional Offices (PROs) kabilang ang higit 2, 100 mula sa Police Regional Office 3.
Ang mga tauhang ito ay ilalagay sa mga pangunahing lugar at kahabaan ng mga rutang dadaanan upang mapalakas ang presensya ng pulisya, makapagbigay ng agarang tugon, at mapanatili ang epektibong pamamahala sa dami ng tao.
Nakahanda rin ang mga special unit upang suportahan ang kabuuang operasyon sa seguridad at tiyakin ang mapayapang pagdaraos ng mga pagtitipon. Kabilang dito ang negotiation at monitoring teams, medical teams, arresting officers, gayundin ang legal at investigation teams na handang rumesponde anumang oras na kailanganin ang kanilang serbisyo.
Aktibo na rin ang pinagsanib na paghahanda sa seguridad kasama ang Pamahalaang Lungsod ng Quezon City, Department of Public Order and Safety (DPOS), Metro Manila Development Authority (MMDA), at iba pang ahensyang may kaugnayan.
Magsasagawa rin ng real-time monitoring sa pamamagitan ng CCTV systems habang mas pinaigting ang social media tracking dahil sa tumataas na online mobilization.
Muli ring binigyang-diin ng PNP na mahigpit na ipinagbabawal ang anumang kilos ng rebelyon, insureksiyon, sedisyon, o pag-uudyok na maaaring magdulot ng kaguluhan o makasira sa isang legal at payapang pagtitipon, alinsunod sa Batas Pambansa Blg. 880 at sa Revised Penal Code.
