PRESYO NG GASOLINA, MULING TUMAAS; MGA DRIVER AT COMMUTER, LUBOS NA APEKTADO
Muling nagpatupad ng dagdag-presyo ang mga kompanya ng langis ngayong November 18, 2025, kung saan umakyat ng P1.20 kada litro ang gasolina at diesel. Dahil dito, agad na naramdaman ng mga motorista sa N.E. Crossing, Lungsod ng Cabanatuan, ang bigat ng pagmahal ng produktong petrolyo.
Sa Shell Gasoline Station, nasa P64.84/L ng Fuel Save Diesel, P71.35 ang V-Power Diesel, P62.50 ang Fuel Save Gasoline, P68.50 ang V-Power Gasoline, at P71.50 ang V-Power Racing.
Samantala, kung ikukumpara sa Shell, mas mababa ang presyuhan sa Petron Gasoline Station. Nasa P57.58/L ang Diesel, P59.58 ang Turbo Diesel, P55.91 ang Xtra Advance, at P56.91 ang XCS.
Mas lalo namang mababa ang presyo sa Cleantech Repsutek, kung saan nasa P51.95/L ang Diesel, P54.60 ang ProTech92, at P54.90 ang Premium95.
Dahil sa tuloy-tuloy na oil price hike, labis itong ikinabahala ng mga tricycle driver na araw-araw umaasa sa kita mula sa pasada. Isa na rito si Melchor Gregorio, na nagsabing halos hindi na sila kumikita dahil sa bigat ng dagdag-gastos sa gasolina.
Hindi lang mga drayber ang apektado; pati mga komyuter ay ramdam din ang epekto ng pagtaas ng presyo ng langis. Ayon kay Cedric Del Mundo, tumataas ang pamasahe tuwing may oil price hike, na lalo namang nagpapahirap sa mga pasaherong araw-araw sumasakay.
