PROVINCIAL GOVERNMENT, 4 NA AHENSYA, PATULOY NA NAGTUTULUNGAN PARA SA MGA NAPAUWING OFWs
Pinagtibay sa 40th Regular Session ng Sangguniang Panlalawigan ang kahilingan ni Governor Aurelio Umali na makipagkasundo sa Department of Migrant Workers (DMW), Overseas Workers Welfare Administration (OWWA), Department of Labor and Employment (DOLE) at Technical Education and Skills Development (TESDA) para sa pagprotekta sa karapatan at kapakanan ng mga Overseas Filipino Workers (OFWs).
Ito ay alinsunod sa Republic Act No. 8042 o “Migrant Workers and Overseas Filipino Act of 1995” na may kaugnayan sa Republic Act No. 11641 o “Department of Migrant Workers Act.”
Ayon kay PESO Manager Ma. Luisa Pangilinan, ang Memorandum of Agreement ay para sa pagtutulungan ng Provincial Government of Nueva Ecija at ng apat na ahensya ng gobyernong nabanggit upang matulungan ang mga Novo Ecijanong OFW na nagkaroon ng problema o hindi naging maayos ang kalagayan sa ibang bansa.
Katuwang din aniya ng OFW Help Desk ng pamahalaang panlalawigan ang mga ahensyang ito para mas mapabilis at maging maayos ang pagpoproseso sa pagpapauwi ng mga distressed OFWs.
Kabilang sa mga natulungan na ng OFW Help Desk ay ang mga Novo Ecijanong nasawi sa ibang bansa na mapauwi sa lalawigan kung saan ay sinasagot na rin ng provincial government ang pagpapalibing, mga napauwing nagkasakit na pinagamot din ni Gov. Oyie, at iba pang nagkaroon ng hindi magandang karanasan doon na p[inagkalooban din ng livelihood assistance katuwang ang apat na ahensya.
Sinabi din ni PESO Manager Pangilinan na isa ang Nueva Ecija sa mga lalawigan sa bansa na unang nagkaroon ng OFW Help Desk sa inisyatibo ni Gov. Oyie.
Ngayong taon mula Enero hanggang Oktubre ay nasa isang daan at limampong OFWs na ang natulungan na karaniwan ay mga Domestic Helpers sa iba’t ibang bansa.
