REVEREND NG SIMBAHAN SA ENGLAND, RUMARAKET SA INUMAN?
Alagad ng Diyos sa umaga, part-timer na bartender naman sa gabi sa isang pub, ang isang reverend sa simbahan sa England na kinilalang si Gary Ward, na isang vicar o kahalili sa All Saints Church.
Ang paborito daw na inumin ng limampu’t anim na reverend ay ang tinatawag na “hell” na ang ibig sabihin sa German ay light.
Dalawang beses sa isang linggo nagtatrabaho si Ward sa pub na kalahating dekada na niyang ginagawa at hindi na rin naman ito bago sa kanya dahil dati na rin siyang nagtrabaho sa bar noong siya ay nasa kolehiyo.
Nilinaw si Reverend Ward na hindi siya sumusweldo sa pagiging bartender sa pub dahil sa halip na bayaran siya ng may-ari nito ay nagbibigay ito ng donasyon sa kanilang simbahan.
Ginagawa aniya niya ito para sa ministry at hindi para kumita ng pera na pansarili.
Nagtrabaho din bilang midwife at healthcare prison officer si Ward bago maging vicar na ngayon ay nasa labing tatlong taon nang nagsisilbi sa simbahan.
Lumalaban man ngayon sa Parkinson’s disease si Ward ay hindi naman ito naging dahilan upang mapigilan siyang patuloy na maghatid ng serbisyo sa tao.
