TOPNOTCHER NA NOVO ECIJANA, PINILI ANG PSYCHOLOGY UPANG TUMULONG: INSPIRASYON NG PANDEMYA, NAGBIGAY-DAAN SA KANYANG MISYON

TOPNOTCHER NA NOVO ECIJANA, PINILI ANG PSYCHOLOGY UPANG TUMULONG: INSPIRASYON NG PANDEMYA, NAGBIGAY-DAAN SA KANYANG MISYON

Nabuo ang hangarin ng isang Novo Ecijana na maging Psychologist dahil sa matinding pagnanais na tumulong sa kapwa kabataang dumaranas ng mga suliraning pang-mental health.

Sa isang panayam, ibinahagi ni Marian Faith R. Galila, 22-anyos mula Cabanatuan City at Magna Cum Laude graduate ng Saint Louis University, na marami sa kanyang mga kaibigan at kakilala ang naghanap ng mental health services noong panahon ng pandemya, dahil kakaunti ang mapuntahang propesyonal, napagtanto niyang kailangan ng mas maraming taong handang umalalay sa kanilang pinagdaraanan, kaya pinili niya ang kursong Psychology.

Taglay ang kanyang inspirasyon, talino, at kababaang-loob, matagumpay na nakapasok si Marian sa hanay ng mga Topnotchers ng 2025 Psychometrician Licensure Examination, kung saan higit 14,000 ang kumuha ng pagsusulit.

Ibinahagi rin ni Marian ang ilang hamon na naranasan niya sa exam, aminado siyang nawalan siya ng focus, ngunit dahil sa matatag na determinasyon, hindi lamang siya nakapasa kundi tumatak pa bilang isa sa mga pinakamahusay sa buong bansa.

Bagama’t ang una niyang pangarap ay mga propesyong may kinalaman sa Matematika, tulad ng Engineering o Architecture, nagbago ang kanyang landas nang mapansin niyang kulang ang komunidad sa mental health support, doon niya naunawaan na mas kailangan siya ng mga tao sa larangang makakatulong sa kanilang emosyonal at sikolohikal na pangangailangan.

Kaya naman kahit nagulat ang kanyang pamilya, na karamihan ay mga engineers at architects, ibinigay pa rin nila ang buong suporta sa kanyang desisyon.

Bukod sa karangalang inuwi ni Marian sa Psychometrician board exam, kinilala na rin siya sa iba’t ibang larangan tulad ng Filmmaking, Mathematics, Journalism, at Arts, na nagpapakita ng kanyang lawak ng talento at dedikasyon sa pag-aaral.

Sa ngayon, nagpapahinga muna siya bago pumasok sa trabaho sa clinical o industrial psychology, wala pa man siyang pinal na plano, nais din niyang ipagpatuloy ang kanyang hilig sa filmmaking.

Ayon kay Marian, isa sa pinakamalaking dahilan ng kanyang mga tagumpay ay ang walang sawang suporta ng kanyang pamilya, lalo na ng kanyang mga magulang, na nagbigay sa kanya ng lakas at kumpiyansa upang patuloy na maniwala sa sarili.

Hiling ni Marian na mabigyang-pansin ang pagtatayo ng mas maraming pasilidad at pagkakaroon ng sapat na bilang ng mga espesyalista na makakatulong sa mga dumaranas ng mental health challenges, nanawagan din siya sa bawat pamilya na maging mas mapanuri at attentive sa mga anak o kapamilyang hindi bukas magsalita tungkol sa kanilang nararamdaman.