Itinutulak sa Kamara ang pag-amiyenda sa batas ng Pantawid Pamilyang Pilipino Program (4Ps) upang madagdagan ang tulong sa edukasyon, kalusugan, at nutrisyon ng mga benepisyaryong pamilya.
Batay sa pahayag ni House Majority Leader at Ilocos Norte Rep. Ferdinand Alexander Marcos, ipinaalam na niya kay Speaker Faustino Dy III na kasalukuyang pinag-aaralan ng House committee on appropriations ang kinakailangang pondo para sa panukalang batas.
SUPORTA SA EDUKASYON, KALUSUGAN, MAS PINALAKAS
Sinabi ni Marcos na mahalagang maipasa ang isang consolidated 4Ps bill upang mapalakas ang suporta sa edukasyon, kalusugan, at nutrisyon, at upang matiyak ang mas tuluy-tuloy na tulong ng pamahalaan sa mga pamilyang Pilipino na kabilang sa mababang kita.
Nauna nang inaprubahan ng House committee on poverty alleviation, na pinamumunuan ni Pampanga Rep. at dating Pangulo Gloria Macapagal-Arroyo, ang substitute bill na pinagsama-sama ang siyam na panukalang naglalayong amyendahan ang 4Ps law o Republic Act No. 11310.
Sa ilalim ng substitute bill, itataas ang education cash grants para sa mga anak ng 4Ps beneficiaries. Mula P300 ay gagawing P500 ang buwanang tulong para sa daycare at elementary pupils; mula P500 ay itataas sa P700 para sa junior high school students; at mula P700 ay magiging P900 para sa senior high school students. Ang tulong na ito ay ipagkakaloob sa loob ng 10 buwan bawat taon.
Kasama rin sa panukala ang pagtaas ng taunang health grant mula P750 patungong P1,800. Magkakaroon din ng karagdagang P400 buwanang ayuda ang mga batang may kapansanan upang matugunan ang mas mataas na gastusin sa gamutan at pangangalaga.
Ipinanukala rin ang pagbibigay ng food and nutrition cash grant na P1,100 kada buwan, gayundin ang pag-institutionalize ng First 1,000 Days cash grant na P400 buwanan para sa mga batang edad zero hanggang dalawang taon, na layong suportahan ang pinakamahalagang yugto ng paglaki at pag-unlad ng bata.
Bukod dito, paiikliin sa tatlong taon ang review period ng cash grant levels at mga resulta ng programa mula sa kasalukuyang anim na taon.
Ang consolidated bill ay kasalukuyang nasa House Committee on Appropriations upang matiyak ang regular, sapat, at tuluy-tuloy na pondo para sa pinalawak na benepisyo ng 4Ps.
Samantala, umani ng halo-halong reaksiyon mula sa mga netizen ang panukalang dagdag-ayuda sa 4Ps.
May ilan na nanawagan na isama rin sa tulong ang iba pang sektor gaya ng mga magsasaka at senior citizens, habang may mga nagsulong ng mas mahigpit na validation ng mga benepisyaryo.
Sa kabilang banda, ipinagtanggol ng ilang 4Ps beneficiaries ang programa, iginiit na ang ayuda ay dagdag-tulong lamang at hindi sapat sa pang-araw-araw na gastusin, habang patuloy pa rin silang naghahanapbuhay.
