VIRAL PRIZE GAME NA MAY IBA’T IBANG “PACKAGE,” PATOK ONLINE
Nakarelate ang mga netizen sa viral post ni Team Ayson patungkol sa game prize idea para sa anumang okasyon na ibinahagi nito sa kanyang social media account.
Sa post ni Team Ayson, ginawa raw nila ito sa birthday celebration ng kanyang anak na si Bela na nagdiwang ng kanyang 7th Birthday kamakailan, kung saan hinuhulaan pa daw ng mga bisita kung ano ang laman sa loob ng mga papremyo na nasa paper bag.
Makikita sa mga paper bag ang mga “packages” na maaaring mapanalunan ng mga bisita, kabilang dito ang kitchen package na kung seseryosohin mo ay maiisip mong mga gamit pang kusina ang laman pero nang makita ang nasa loob ay mga condiments pala.
Mayroon ding self-care package na kung iisipin mo ay mga beauty products o cosmetics ang laman ngunit mga gamit pala sa pagligo, habang ang trip to Korea naman na aakalain mong travel ticket ay naglalaman pala ng mga iba’t ibang Korean noodles.
Ang whitening package naman na aakalain mong pampaputi ng balat ang nasa loob ay pampaputi pala o pantanggal ng mantsa sa damit, at sa PC package naman ay literal na ang ibig sabihin pala ay Pancit Canton.
May mga netizen din ang nagbahagi ng kanilang karanasan at mga larawan sa paglalagay ng twist sa papremyo sa mga palaro na ginawa rin nila sa magkakaibang okasyon.
Ayon sa mga comments ng mga netizen kakaibang saya daw ang hatid ng kakaibang pakulo na ito para mas mapasigla ang selebrasyon ng anumang okasyon.
Umani ng mga positibo at nakatutuwang komento ang post at nakakuha ng mahigit 20, 000 reactions at mahigit 9, 000 shares.
