Pinalakas ng Philippine National Police (PNP) ang kampanya kontra ilegal na droga sa Cordillera mula August 10 hanggang 16, 2026.
Bilang resulta, nasamsam ng mga pulis ang ilegal na droga na tinatayang nagkakahalaga ng ₱227,015,732.
12 INDIBIDWAL, INARESTO DAHIL SA ILEGAL NA DROGA
Bukod dito, 12 indibidwal ang naaresto sa isinagawang magkakahiwalay na operasyon sa rehiyon.
Sa kabuuan, nagsagawa ang mga police unit ng 17 operasyon laban sa ilegal na droga.
Kabilang dito ang marijuana eradication, buy-bust operations, pagpapatupad ng warrants, at pagtugon sa mga insidente.
Samantala, umabot sa humigit-kumulang 1.12 milyong fully grown marijuana plants ang nabawi ng mga awtoridad.
Nasamsam din ang 50,000 marijuana seedlings, 150 gramo ng dried marijuana leaves at fruiting tops.
Bukod pa rito, narekober ang 8.49 gramo ng hinihinalang shabu sa mga operasyon.
Batay sa standard drug pricing, umabot sa ₱227,015,732 ang pinagsamang tinatayang halaga ng mga nasamsam.
Kabilang sa mga lugar na nagtala ng malaking recovery ang Kalinga, Mountain Province, Baguio City, Apayao, at Benguet.
Samantala, nahaharap sa kaukulang kaso ang 12 naarestong indibidwal sa ilalim ng Republic Act No. 9165.
Ayon kay Chief PNP Police General Jose Melencio C. Nartatez Jr., mahalagang ipagpatuloy ang kampanya laban sa ilegal na droga.
Partikular itong mahalaga sa mga lugar kung saan nananatiling suliranin ang pagtatanim ng marijuana.