Ibinida ng Department of Tourism – Region III (DOT III), kasama ang Angeles City Tourism Office (ACTO), ang mga pangunahing kultura at culinary highlights ng Central Luzon sa Philippine Festival Tokyo 2025 na ginanap sa Yoyogi Park, Shibuya, Tokyo, Japan.
Agaw atensyon ang Central Luzon Booth dahil sa interactive activities, cultural showcases, at regional flavors.
Isa sa ‘well loved’ and ‘most visited’ segments ay ang kulitan script writing session ng kilalang Kapampangan Calligrapher na si Tang Lucio Sison.
Nagkaroon din ng food tasting ng Kapampangan favorites tulad ng batirol, pati display ng kilalang delicacies ng Pampanga.
Ipinakita rin ang cultural identity ng rehiyon sa pamamagitan ng Puni de Malolos décor mula Bulacan at Christmas-themed pieces gaya ng Pampanga lanterns.
Dumalo sa booth ang ilang distinguished guests, kabilang sina Philippine Ambassador to Japan Mylene Garcia-Albano; Mayor Yoshito Arisaka ng Minamimaki-mura, Nagano Prefecture; at Alan Shirahama na miyembro ng grupong GENERATIONS at Philippine Tourism Ambassador for Japan.
Sa press release ng DOT III, nakasaad na layunin nilang mas mapalakas ang visibility ng Central Luzon sa Japan, at maipromote ang heritage, creativity, at culinary identity ng rehiyon sa libo-libong festival visitors.
