Umapela ang mga lokal na magsasaka ng sibuyas mula sa bayan ng Bongabon, Nueva Ecija, na kilala bilang Onion Capital Of The Philippines, sa pamahalaan na huwag sanang isabay ang pagpasok ng imported na sibuyas tuwing panahon ng anihan sa bansa.
Ayon kay Enrico Cabuhat, sampung taon nang nagtatanim ng sibuyas, malaki ang epekto ng sabayang importasyon sa farmgate price na siyang nagpapababa sa kita ng mga magsasaka.
Aniya, bagamat may pagkakataong kumikita nang malaki sa sibuyas, madalas din umano silang nalulugi lalo na kapag bumabagsak ang presyo at tinatamaan pa ng harabas ang ani.
Umaabot sa mahigit P250,000 ang puhunan sa bawat ektarya kaya’t mabigat ang epekto kapag hindi nabawi ang kapital at napipilitang umutang sa mataas na interes.
Sa kabila nito, patuloy pa rin silang nagtatanim dahil ito na ang pangunahing kabuhayan at pinagkukunan ng panggastos sa pag-aaral ng kanilang mga anak.
Hiniling din ng mga magsasaka sa mga mamimili na suportahan ang lokal na sibuyas upang matiyak ang tuloy-tuloy na produksyon sa bansa.
Iginiit nila na hindi sila tutol sa importasyon, ngunit sana’y isaalang-alang ang tamang timing upang hindi malugi ang mga lokal na magsasaka.
