Labinlimang (15) composting facility para sa biodegradable waste ang ipinamahagi sa iba’t ibang benepisyaryo sa lalawigan ng Nueva Ecija bilang bahagi ng programang naglalayong mabawasan ang basura at makatulong sa pagpapabuti ng kalidad ng lupaing sakahan.
Pinangunahan ni Vice Governor Gil Raymond Umali ang naturang pamamahagi ng mga kagamitan sa mga benepisyaryo.
Ayon kay Engineer Mary Joyce B. Rivero ng Bureau of Soils and Water Management, kabilang sa ipinamahaging kagamitan ang rotary composter at biomass shredder na gagamitin sa pagproseso ng mga nabubulok na basura upang gawing compost o organikong pataba.
Ipinaliwanag ni Rivero na layunin ng programa na matugunan ang problema sa basura sa bansa habang tinutulungan din ang mga magsasaka na mapabuti ang kondisyon ng kanilang mga lupa.
Dagdag pa niya, inaasahan na makikinabang sa proyekto ang mga barangay local government unit, farmers’ association at cooperative, pati na rin ang mga pampublikong paaralan sa lalawigan.
Nagpasalamat naman si Juanito Ligamia ng Dr. Ramon de Santos National High School sa natanggap na pasilidad na aniya’y malaking tulong sa kanilang paaralan.
Aniya, maaaring gawing compost ang mga basura mula sa school canteen at mga tuyong dahon sa paligid ng paaralan upang maging pataba sa mga halaman.
Nagpahayag din ng pasasalamat si Philip Sagario ng Integrated Farmers Association sa Piglisan, Cuyapo, dahil makatutulong umano ang pasilidad upang makabawas sa gastos sa pataba.
Ayon kay Sagario, sa halip na bumili ng mamahaling fertilizer tulad ng urea na umaabot sa humigit-kumulang ₱1,500, maaari na silang gumawa ng sariling pataba mula sa mga dayami at iba pang biodegradable na materyales.
Umaasa ang mga benepisyaryo na magagamit nang maayos ang mga ipinamahaging kagamitan upang makatulong sa pagbawas ng basura at sa pagpapalakas ng produksyon sa agrikultura sa lalawigan.
