Umaabot sa mahigit 330 estudyante sa bayan ng Santa Rosa ang tumanggap ng tig-P2,500 na pinansyal na tulong mula sa Pamahalaang Panlalawigan ng Nueva Ecija bilang bahagi ng Educational Financial Assistance Program para sa unang semestre ng School Year 2025–2026.
Ayon sa ilang benepisyaryo, ilalaan nila ang natanggap na halaga bilang pandagdag sa pambayad ng tuition sa susunod na semestre, bukod sa iba pang gastusin sa pag-aaral.
Hinimok naman ng pamahalaang panlalawigan ang mga iskolar na pagbutihin ang kanilang pag-aaral upang mapanatili ang kanilang scholarship.
Isa sa mga benepisyaryo si John Constantine Castro, fourth year college student mula sa Central Luzon State University o CLSU, na tumatanggap ng scholarship mula unang taon hanggang kasalukuyan.
Ayon sa kanya, naging hamon sa kanyang pag-aaral ang kakulangan sa pananalapi.
Samantala, ibinahagi ng isang first year student mula sa Holy Cross College o HCC ang kanyang karanasan bilang iskolar.
Ayon sa kanya, nagagamit niya ang natanggap bilang suporta sa kanyang bayarin sa paaralan.
Nagbahagi rin si Angel Kim Bautista, first year BSBA student mula sa Araullo University o AU, ng kanyang sitwasyon.
Ayon sa kanya, nakatutulong ang natanggap na halaga sa kanyang gastusin sa paaralan.
Nagpahayag naman ng pasasalamat ang iskolar ng bayan sa educational financial assistance program na kanilang natanggap.
Ang pamamahagi ng pinansyal na tulong sa edukasyon ay bahagi ng programa ng Pamahalaang Panlalawigan ng Nueva Ecija para sa mga estudyante sa lalawigan, sa pamumuno nina Gov. Aurelio “Oyie” Umali at Vice Gov. Emmanuel “Kuya Lemon” Umali.
