BAGSAK-PRESYO NG SIBUYAS: Sa Talavera, Nueva Ecija, kapansin-pansin ang pagbaba ng presyo ng sibuyas na direkta nang ibinebenta sa mga roadside stall sa Bakal Tres.
Ayon sa tindera na si Vanessa Gonzaga, nasa P350 ang bawat bag o sampung kilo ng puting sibuyas; P250 hanggang P550 naman ang isang bag o 10 kilo rin ng pulang sibuyas, depende sa laki. Habang, P50 hanggang P70 naman ang kada kilo.
Maliban sa sibuyas, mabibili rin ang iba pang produktong agrikultural tulad ng manggang kalabaw na naglalaro sa P50 hanggang P80 kada kilo at imported na bawang na nasa P140 kada kilo.
BAGSAK-PRESYO NG SIBUYAS SA NUEVA ECIJA, GINHAWA SA MGA MAMIMILI
Mayroon ding iba pang gulay at prutas gaya ng repolyo, pipino, at kamoteng baging na abot-kaya ang presyo dahil mabibili lamang ito sa halagang P50 ang kada kilo.
Ayon kay Gonzaga, bagama’t hindi nila gaanong nararamdaman ang pagtaas ng produktong petrolyo dahil hindi naman aniya sila madalas na gumagamit nito. Gayun pa man, hindi pa rin sumasapat ang kanilang kita para makatugon sa kanilang mga pangangailangan.
Samantala, bukas ang kanilang tindahan ng 24 oras kaya’t mas napapadali ang pagbili ng sariwang ani ng mga lokal na magsasaka. Patuloy namang hinihikayat ang publiko na suportahan ang mga lokal na produkto.
