Bawal putulan ng kuryente ang mga power consumer sa buong bansa simula ngayong buwan ng Mayo hanggang Hunyo 2026. Tiniyak ng Philippine Rural Electric Cooperatives Association (PHILRECA) ang kahandaan ng bawat electric cooperative sa utos na ito.
Ayon kay PHILRECA Executive Director Atty. Janeene Depay-Colingan, sanay na ang mga kooperatiba sa ganitong sitwasyon. Sa katunayan, nagawa na nila ito noong panahon ng pandemya at iba pang malalaking sakuna.
Ang hakbang na ito ay alinsunod sa direktiba ng Energy Regulatory Commission (ERC) para sa publiko. Inilabas ang kautusan dahil sa nararanasang krisis sa produktong petrolyo dulot ng mga kaguluhan sa Middle East.
Bukod dito, layunin nitong bigyan ng sapat na palugit ang mga pamilyang hirap sa bayarin ngayon. Samantala, nasa 111 electric cooperatives na ang nagpapatupad ng utay-utay na pagbabayad para sa mga consumers.
BAWAL PUTULAN NG KURYENTE: REAKSYON AT SUHESTIYON NG MGA CONSUMER
Nagpahayag ng iba’t ibang saloobin ang mga residente tungkol sa pansamantalang ginhawa na hatid ng suspension.
Samantala, binigyang-diin ng consumer na si Marilou Castro na tila walang maitutulong ang suspension na ito.
Naniniwala siya na kailangan pa rin itong bayaran kaya mas mainam sana kung may discount.
Ayon naman kay Christopher Calosa, makakatulong ang utos na ito para sa mga pamilyang walang pambayad.
Gayunpaman, pinaalalahanan ni Calosa ang publiko na dapat pa ring pag-ipunan ang bill dahil tiyak na maiipon ito.
Kung installment ang pag-uusapan, pabor ang mga consumer dito basta siguradong walang kalakip na tubo.
Sa kabilang banda, mas mabuting bayaran na agad ang bill kung may pera ayon kay Castro. Ito ay upang hindi na makaabala pa sa trabaho o maging pasanin sa susunod na buwan.
BAWAL PUTULAN NG KURYENTE: DETALYE NG IMPLEMENTASYON SA NEECO II – AREA 1
Bilang pagtalima sa utos ng ERC, naglabas na rin ng opisyal na abiso ang NEECO II – Area 1.
Ang suspensyon ng disconnection ay epektibo simula May 2026 hanggang July 2026 billing cycle.
Nilinaw ng kooperatiba na maaari pa ring maputulan ang sinumang hindi nakabayad ng bill noong Abril 2026.
Samantala, ang staggered payment naman ay para lamang sa mga consumer na kumokonsumo ng 200 kWh pababa.
Maaaring bayaran ang bill ng Mayo hanggang Hulyo at ang Hunyo naman ay hanggang Agosto.
Gayundin, ang bill ng Hulyo ay pwedeng bayaran hanggang Setyembre ngayong taon.
Dahil dito, hinihikayat pa rin ang mga may kakayahan na magbayad sa tamang oras.
Mahalaga ang suporta ng bawat member-consumer-owner para sa tuloy-tuloy na serbisyo ng ating kooperatiba.
Higit sa lahat, ang disiplina sa pagbabayad ay makakatulong upang maiwasan ang pagpapatong-patong ng utang.
