Nahinto sa pag-aaral si Aristotle C. Capacillo noong 2014, ngunit hindi siya sumuko sa kanyang pangarap.

Matagumpay niyang natapos ang Bachelor of Science in Electrical Engineering sa Nueva Ecija University of Science and Technology (NEUST) bilang bahagi ng Batch 2026.

Patunay ito na hindi hadlang ang mga pagsubok at pagkaantala sa pag-aaral upang makamit ang tagumpay.

Sa likod ng kanyang natamong tagumpay ay isang mahabang paglalakbay bilang working student.

NAHINTO SA PAG-AARAL, NGUNIT NAGPATULOY SA PANGARAP

Pinagsabay ni Capacillo ang trabaho at pag-aaral sa loob ng maraming taon. Hinarap niya ang night shift duties at kakulangan sa tulog.

May mga araw ding halos pinagdugtong-dugtong lamang niya ang ilang oras na pahinga.

Gayunpaman, patuloy siyang pumapasok sa klase at ginagampanan ang kanyang mga responsibilidad.

Ibinahagi niya na dumaan siya sa mga panahong tila bumabagal ang takbo ng kanyang buhay. Subalit hindi siya kailanman tumigil sa pag-abot ng kanyang mga pangarap.

Naging malaking bahagi ng kanyang paglalakbay ang suporta ng kanyang mga kaklase, kamag-anak, at kaibigan.

Lagi silang handang tumulong sa oras ng pangangailangan. Pinasalamatan din niya ang kanyang mga naging katrabaho sa NEUST CSU.

Kabilang din dito ang mga instructor, propesor, at iba pang gurong nagbahagi ng kaalaman at gabay sa kanya.

NAHINTO SA PAG-AARAL, SINUPORTAHAN NG PAMILYA AT MGA KAIBIGAN

Kabilang sa kanyang kinilala ang NEECO II – Area 2, Dito niya isinagawa ang kanyang on-the-job training.

Sa pamamagitan nito, naipakita niya ang kanyang kakayahan sa larangan ng electrical engineering.

Aminado si Capacillo na naging mahaba ang kanyang paglalakbay matapos siyang mahinto sa pag-aaral noong 2014.

Sa kanyang pagbabalik sa kolehiyo, ilan sa kanyang mga dating kabatch ay naging mga instructor na niya, gayunman, lalo lamang nitong pinatibay ang kanyang determinasyong makatapos.

MULA SA NAHINTO SA PAG-AARAL HANGGANG SA PAGTATAPOS

Ayon sa kanya, ang bawat puyat, pagod, at sakripisyo ay naging bahagi ng kanyang paghubog bilang estudyante at bilang tao.

Higit sa lahat, inialay niya ang tagumpay na ito sa kanyang pamilya. Inialay rin niya ito sa kanyang yumaong kuya na naging inspirasyon niya sa pagpapatuloy ng laban.

“Kuya, miss na kita. Ito na po yung pinangako ko sa’yo na hangga’t hindi ako gumagraduate, hindi ako magkaka-girlfriend. Kung nasaan ka man ngayon, sigurado akong nakangiti ka sa’kin,” bahagi ng kanyang mensahe.

Sa darating na Hunyo 19, tatanggapin ni Aristotle C. Capacillo ang kanyang diploma. Isa itong bunga ng mga taon ng pagsisikap, pagtitiis, at pananampalataya.

Higit sa lahat, simbolo ito ng kanyang hindi pagsuko sa kabila ng mga pagsubok sa buhay.