Isang makabagbag-damdaming patotoo ng pananampalataya ang ibinahagi ni Sis Dhang Carillo sa programang Count Your Blessings na pinangungunahan ni dating Governor at Congresswoman Czarina “Cherry” D. Umali.
Kuwento ni Sis Dhang, sumailalim siya sa isang operasyon sa gallbladder nang hindi nalalamang tatlong buwan na pala siyang buntis.
Ang masakit pa rito, siyam na pregnancy test at iba’t ibang laboratory examination ang ginawa sa kanya bago ang operasyon, ngunit lahat ito ay nagnegatibo kaya walang kamalay-malay maging ang kanyang mga doktor.
Sa kabila ng banta ng general anesthesia at iba pang medikal na panganib, isang malaking himala na ligtas at walang anumang komplikasyong isinilang ang kanyang anak na si Precious Alexia.
Ayon kay Sis Dhang, ang bawat yugto ng paglaki ng kanyang anak ay patunay ng pagdinig ng Diyos sa kanilang mga panalangin.
Kaya naman hinikayat niya ang publiko na patuloy na magtiwala sa Panginoon, ang natatanging may kontrol sa mga himalang hindi kayang ipaliwanag ng siyensya at ng tao.
