Nilinaw ng Department of Social Welfare and Development o DSWD na hindi awtomatikong nadidiskwalipika sa mga susunod na tranche ng Uplift Assistance ang mga benepisyaryong hindi nakakuha ng unang P2,000 payout.
MANUAL PAYOUT, SUSI SA BERIPIKASYON AT DIGITAL ENROLLMENT
Ayon sa DSWD, mahalagang makuha ng mga benepisyaryo ng Group 2 na tinukoy sa pamamagitan ng Community-Based Monitoring System ang unang payout dahil dito isinasagawa ang beripikasyon ng kanilang pagkakakilanlan at enrollment sa digital payment system.
Isinasagawa nang personal o manual ang unang payout upang matiyak ang tamang pagkakakilanlan ng benepisyaryo at maiwasan ang maling impormasyon sa masterlist.
Kasabay nito ang pagpaparehistro ng digital wallet gaya ng GCash, Maya, o LandBank account, kung saan ipapadala ang susunod na P2,000 buwan-buwan mula Agosto hanggang Disyembre.
MGA KATIBAYAN NG PAGKAKAKILANLAN, NILINAW NG DSWD
Gagamitin bilang pangunahing pagkakakilanlan ang PhilSys National ID o ePhilID. Kung wala pa nito, tumatanggap din ang DSWD ng iba pang government-issued ID tulad ng Driver’s License, Passport, Voter’s ID, SSS/UMID, GSIS e-Card, PhilHealth ID, Postal ID, PRC ID, Senior Citizen ID, PWD ID, Solo Parent ID, at Barangay ID.
“NO RECORD FOUND,” HINDI NANGANGAHULUGANG NATANGGAL SA PROGRAMA
Nilinaw din ng DSWD na ang paglabas ng status na “No Record Found” sa Uplift Government-to-Person app ay hindi nangangahulugang natanggal na sa programa ang isang benepisyaryo. Ibig sabihin lamang nito ay hindi pa naa-activate ang account dahil hindi pa nakukumpleto ang paunang manual payout.
AUTHORIZED REPRESENTATIVE, MAAARING TUMANGGAP NG AYUDA
Para sa mga hindi makakadalo sa itinakdang araw ng payout dahil sa pagkakasakit, trabaho, o iba pang mahalagang dahilan, maaaring magtalaga ng awtorisadong kinatawan na miyembro ng pamilya. Kinakailangan lamang ang authorization letter at mga valid ID ng benepisyaryo at ng kinatawan.
SPECIAL, UNCLAIMED PAYOUTS, MAAARING ALAMIN SA LGU
Maaari ring makipag-ugnayan ang mga benepisyaryo sa kanilang barangay o sa City o Municipal Social Welfare and Development Office upang malaman ang iskedyul ng special o unclaimed manual payouts.
DIGITAL ENROLLMENT, KAILANGANG MAKUMPLETO PARA SA MGA SUSUNOD NA AYUDA
Binigyang-diin ng DSWD na hindi nawawala ang karapatan ng isang kwalipikadong benepisyaryo sa mga susunod na payout dahil lamang sa hindi nito nakuha ang unang P2,000. Gayunman, kinakailangan pa ring makumpleto ang unang manual payout at enrollment sa digital payment system upang maipadala ang mga susunod na buwanang ayuda sa nakatalagang e-wallet.
