Patuloy na ginagamit sa ilang ospital sa Pilipinas ang artificial intelligence upang mapabilis ang pagsusuri ng mga pasyenteng may stroke. Ayon sa St. Luke’s Medical Center, may AI-powered imaging system na tumutulong sa mas mabilis na pagbasa ng CT at MRI scans. Sa ganitong paraan, agad natutukoy kung may bara sa ugat o pagdurugo sa utak at kung ang pasyente ay maaaring sumailalim sa mechanical thrombectomy o iba pang paggamot.
Ayon sa American Stroke Association, ang mabilis at tamang diagnosis ay mahalaga upang mabawasan ang permanenteng pinsala sa utak. Binibigyang-diin din ng World Stroke Organization na bawat minutong delay sa paggamot ay may katumbas na pagkawala ng brain cells.
Sa konteksto ng Pilipinas, mahalaga ang ganitong teknolohiya lalo na kung kulang ang neurologist sa ilang ospital.
Limitadong Access at Pinalalakas na Sistema
Bagama’t may kakayahan na ang ilang malalaking ospital na magsagawa ng mechanical thrombectomy, hindi pa ito pantay sa buong bansa. Ayon sa mga pag-aaral tungkol sa stroke care system sa Pilipinas, mababa pa rin ang thrombectomy rate dahil sa kakulangan ng kagamitan at trained specialists.
Ayon sa Stroke Society of the Philippines, mahalaga ang pagbuo ng mas maraming Acute Stroke Ready Hospitals at mas maayos na referral network upang agad mailipat ang pasyente sa ospital na may kakayahang magsagawa ng advanced procedure. May mga diskusyon din, ayon sa PhilHealth, hinggil sa pagpapalawak ng insurance coverage para sa stroke procedures upang mabawasan ang gastusin ng mga pasyente.
Rehabilitasyon, Robotics at Hinaharap ng Stroke Care
Hindi natatapos sa emergency treatment ang pangangalaga sa stroke. Mahalaga ang rehabilitasyon upang maibalik ang galaw at kakayahan ng pasyente. Sa ilang ospital sa Metro Manila, ginagamit na ang robotic rehabilitation technology bilang suporta sa therapy.
Ayon sa Ospital ng Maynila Medical Center, inilunsad ang Robotics Rehabilitation Program na gumagamit ng Hybrid Assistive Limb exoskeleton para tulungan ang mga pasyente sa paggalaw. Sa Sta. Ana Hospital, may Physical Therapy and Rehabilitation Medicine and Robotics Center na gumagamit ng robotic devices para sa stroke rehabilitation.
Samantala, ayon sa Chinese General Hospital and Medical Center, ginagamit ang Lokomat®Pro robot-assisted gait training system upang matulungan ang mga pasyente na muling matutong maglakad. Sa pribadong sektor, ayon sa Cardinal Santos Medical Center, may In-Motion robotic therapy system para sa upper limb rehabilitation.
Ayon sa Department of Science and Technology, ang paggamit ng robotics sa rehabilitasyon ay nakatutulong sa mas eksaktong pag-uulit ng galaw na mahalaga sa neuroplasticity o kakayahan ng utak na bumuo ng bagong koneksyon matapos ang pinsala. Gayunpaman, hindi nito pinapalitan ang therapist kundi nagsisilbing katuwang sa mas sistematikong therapy.
Sa maka tutal, ipinapakita ng pinagsama samang AI diagnosis, advanced intervention, at robotic rehabilitation na unti-unting umaangat ang antas ng stroke care sa Pilipinas. Gayunpaman, nananatiling hamon ang pantay na access sa teknolohiya sa buong bansa.